Х.Нямбаатар: Ирэх аравдугаар сарын сүүл хүртэл зам засварын ажил үргэлжилнэ

Нийслэлд зам засварын ажил ид дундаа үргэлжилж байна. Энэ долоо хоногт таван байршилд нийт 5.3 км авто замыг шинэчилнэ.  Тухайлбал, Сүхбаатар дүүргийн 8, 9 дүгээр хорооны нутаг дэвсгэр Их тойруугийн авто зам Дөлгөөн нуур худалдааны төвийн уулзвараас Өлзий төв хүртэлх авто замын хоёрдугаар хэсгийн засвар, шинэчлэлтийн ажлыг есдүгээр сарын 21-нээс эхлүүлэхээр болжээ.

Зам засварын ажил иргэдийн ажил төрөл, хичээл сургуультай зэрэгцэж байгаад нийслэлчүүд бухимдаж буй. Тэгвэл үүнд Хотын дарга дараах тайлбарыг хийжээ. 

Тэрбээр "Манайхан энэ жил хийж байгаа зам засварын ажлуудаа эрт эхлэхгүй ид ачааллын үеэр зам хаалаа гэж шүүмжилж байна. Энэ зөв өө. Хот жилдээ 15 орчим км зас засварын ажил хийдэг байсан. Сүүлийн 10 гаруй жил хотын хэмжээнд зам засварын ажлыг дорвитой хийгээгүйн улмаас замууд бүхэлдээ муудсаныг бүгд мэднэ. Бид 4 сарын сүүлээр зам засварын ажлыг эхлүүлж, замын хөгжлийн сангийн хөрөнгөөр 17 байршилд зам засварын ажил хийсэн.

Гэхдээ зам засахад мөнгө хэрэгтэй. Тиймээс  зургадугаар сард дотоод зах зээлээс бонд босгож, тодорхой хувийг нь зам засвар арчлалтын ажилд зориулах шийд гаргасан. Улмаар зураг төсвөө батлуулж, хуулийн дагуу тендер зарлаж, эхний тендер долдугаар сарын 28-нд шалгарсан.
Бид энэ жил энэ эрчээрээ нийт гол замуудынхаа дийлэнхийг засах төлөвлөгөөтэй ажиллаж байна. Ирэх аравдугаар сарын сүүл хүртэл зам засварын ажил үргэлжилнэ. Тиймээс та бүхэн маань нөхцөл байдлыг ойлгож хүлээцтэй хандаасай гэж хүсэх байна.

Харин дараа жилээс Туулын хурдны замыг эхлүүлж, хотын туслах замууд, хороолол дундах замуудыг засна. Мөн ирэх жил хийгдэх ажлуудын гүйцэтгэгчийг шалгаруулах тендерийг өвөл хийж амжуулахаар төлөвлөж байна" гэв.