Авто зам шинэчлэлийн ажлыг зогсоохыг иргэдийн 90 хувь нь дэмжихгүй байна

Нийслэлийн хэмжээнд энэ онд 87 байршилд 162.3 км авто зам шинэчилнэ. Хотын дарга Х.Нямбаатар авто зам шинэчлэлийн ажлыг зогсоож, хуулийн байгууллагад шалгуулах эсэх талаар санал асуулга явуулга асууж эхэлсэн билээ. 

Энэ хүрээнд нийслэлийн Засаг даргын Тамгын газрын албан ёсны www.ulaanbaatar.mn сайтаар санал асуулга аваад хоёр хонож байна. Одоогийн байдлаар нийт 1406 иргэн саналаа өгснөөс 1266 иргэн буюу 90 хувь нь дэмжихгүй гэжээ. 

Хотын дарга Х.Нямбаатар "Намайг хотын даргын ажлыг авахад нийт гомдол мэдээллийн дийлэнх нь "замаа зас" гэсэн байсан. Зам засахад өмнөх дарга нарт төсөв хүрэлцдэггүй зовлон байсан.Бид энэ жил бонд гаргаж, зам засварын ажлыг санхүүжүүлсэн. Энэ жил 87 замын ажил хийгдэхээс дөнгөж 27 нь бүрэн дууссан. Цаана нь 60 зам хучигдахгүй үлдээд замын төсөв нь зах зээлийн үнэндээ нийцэж байгаа эсэхийг хуулийн байгууллагаар шалгуулаад ирэх хавар ажлыг эхлүүлбэл ямар вэ гэдэг санал асуулгыг явуулна" гэж мэдээлсэн билээ. 

Иргэд та бүхэн тус линкээр санал асуулгад оролцох боломжтой. https://vote.ulaanbaatar.mn/home