Д.Амарбаясгалан: "Aqua garden” хотхоныг нэмж барих зөвшөөрөл өгсөн асуудлаар яаралтай мэдээлэл ирүүл

УИХ-ын чуулганы өнөөдрийн хуралдаанаар үеэр УИХ-ын гишүүн Г.Дамдинням “Aqua garden” хорооллын асуудлыг хөндлөө.
Энэ үеэр  УИХ-ын дарга Д.Амарбаясгалан: Г.Дамдинням гишүүн сүүлийн хоёр жил энэ асуудлыг ярьж байгаа.Засгийн газрын гишүүд, хотын удирдлагууд энэ газар очихоороо олон нийтэд зориулаад “нураана” гэдэг попорсон мэдээлэл өгөөд яваад байдаг. Хоёр жилийн өмнө Ерөнхий сайд очиж ажиллаад, " Голын голдиролд барилга барьж, үерийн эрсдэл үүсгэсэн учир нураана" гэж мэдэгдсэн. Гэтэл үүнээс хойш зөвшөөрөл нэмж өгсөн асуудлыг шалга гэдгийг Д.Дамдинням гишүүн шаардаж байгаа. Үүнд Засгийн газрын гишүүд, холбогдох хотын удирдлагууд бодит ажил хийснээ долоо хоногийн дотор УИХ-д мэдээлэл ирүүл. Шаардлагатай гэж үзвэл УИХ-ын даргын захирамжаар ажлын хэсэг байгуулаад яг энэ үйл явцыг шалгах ёстой. Энэ нь нийгэмд шударга ёс гэж байдаг уу, олон нийтийн эрх ашиг чухал уу гэдгийг нотлох учир үүнд бид онцгой анхаарч ажиллана. Түүнээс биш УИХ-ын гишүүний хөндсөн асуудалд янз бүрийн аргаар тайлбар тавьдаг байдлыг бид таслан зогсооно. Салбарын сайд, хотын дарга үүнд бодитой алхам хий.  Ялангуяа Ерөнхий сайдыг ажилласан өдрөөс хойш ямар зөвшөөрөл нэмж өгсөн, хэн өгсөн гэдгийг тодорхой болгож, шаардлагатай бол хууль хяналтын байгууллагад шилжүүлэх ёстой. Төрийн хууль гурав хоног хэрэгждэг гэдэг үг байдаг. Албан тушаалтнууд хуулийн дагуу ажиллах ёстой. Хууль бол хууль, журам бол журам. Цаашид журмын зохицуулалтыг хязгаарлаж, цөөлнө" гэлээ.