Гэмтсэн бор гөрөөсийг амьтан хамгаалах төвд эмчилж, байгальд нь буцаан тавина

Нийслэлийн ногоон бүсэд амарч зугаалж яваа болон ойн дагалдах баялаг түүж ашиг олох гэсэн иргэд зэрлэг амьтдын цөм байршил нутагт отоглон  амьтдыг амьдрах орчноос дайжуулснаар  бор гөрөөс, халиун буга зэрэг амьтдын зуслангийн хашаанд хашигдан золбин болон тэжээвэр нохдод хөөгдөх, хүн авто машинаас үргэн зугтах, хашааг давж шурган гарахдаа хашаанд сүлбэгдэж, эсхүл хашааны завсар тээглэж гацаж үхсэн, бэртэж гэмтсэн  дуудлага Нийслэлийн байгаль орчны газар ирдэг байна.

Жишээ нь  8 дугаар сарын 21-ний өдөр СБД-ийн 19 дүгээр хороо Хуурай мухарын аманд айлын хашаанд зэрлэг амьтан байна гэсэн дуудлагаар тус хэсгийг хариуцсан байгаль хамгаалагч очиход айлын хашаанд хавчуулагдсан бор гөрөөс байсныг хашаанаас салган авч Нийслэлийн Байгаль орчны газрын Амьтан асран хамгаалах төвд авч иржээ. 
Үзлэгээр бор гөрөөс хашаанд хавчуулагдан холгогдсон гүн шархтай шарх идээлсэн байсан бөгөөд анхан шатны тусламжийг үзүүлж тус төвд асарч эмчилж байна. Тодорхой хугацаанд тухайн амьтны бие сайжирсан үед суурьшлын бүсээс гаргаж байгальд тавих аж.