Тодруулга: Шүдний үзлэг хийхдээ багажаа салфеткаар арчсан гэх Солонгос эмч нар ямар ч зөвшөөрөлгүй байсан

Иргэн Х.Хонгорзул Солонгос эмч нар иргэдийн шүдийг үзэхдээ ямар нэгэн ариутгал хийхгүй байгаа талаар цахим хуудаснаа мэдээлсэн.Тодруулбал, тэрбээр шүлс соруулагчийг арчиж олон хүнд нэг сорогчоор үйлчилсэн, бээлийгээ савандаж угааж байсан, үзлэгийн багажаараа 50 настай хүн үзээд бүгдийг нь салфеткаар арчиж 11 настай охины шүдийг үзсэн гэх асуудлыг нийтэлжээ.

Дээрх асуудал нь Хэнтий аймгийн Биндэр суманд болсон байна. Мэдээллийн дагуу бид Эрүүл мэндийн яамны хэвлэлийн төлөөлөгчөөс тодрууллаа. 

Тэрбээр:

"Уг асуудлаар Эрүүл мэндийн сайд чиглэл өгч албаныхан Хэнтий аймгийн Биндэр сумын эмнэлэгт ажиллаад ирсэн. Гадаад эмч нар Монгол улсад ирж эмчилгээ, үйлчилгээ үзүүлэхдээ Эрүүл мэндийн хөгжлийн төвөөс зөвшөөрөл авах ёстой байдаг. Гэвч тухайн Солонгос эмч нар зөвшөөрөл аваагүй байсан нь хяналтаар батлагдсан. Одоогоор тус сумын эмнэлгийн шүдний кабинетыг хаасан. ЭМЯ-наас таван хүний бүрэлдэхүүнтэй баг гарч Биндэр суманд очоод газар дээр нь хяналт шалгалт хийсэн. Хэрэглэсэн багажуудаас дээж авч, ариутгал хийсэн эсэхийг шалгасан, хариу одоогоор гараагүй байна. Шалгалтын багийнхан тухайн Солонгос эмч нараас мэдүүлэг авч байгаа" гэв.