Н.Өнөрбаяр: Миний дүү Н.Өнөрцэцэгийг харлуулах тролл баг өчигдрөөс ажиллаад эхэлсэн

Сэтгүүлч Н.Өнөрцэцэгийг цагдан хоригдсон асуудлаар ар гэрийнхэн нь Төрийн гурван өндөрлөгт хандлаа. 

Н.Өнөрцэцэгийн эгч Н.Өнөрбаяр “Дүүг минь таван хэргээр шалгаж, 4,9 жилийн хорих ял оноолоо. Хоёр нь татвартай холбоотой хэрэг гэж байгаа юм. Гэтэл татварын хэрэг эрүүгийн хэрэг биш шүү дээ. Төрийн нууц гэгдээд буй хэрэгт дүү минь холбоогүй. Үнэндээ бид Төрийн гурван өндөрлөгт хандахаас өөр арга байхгүй болоод байна. Шүүх буруу шийдвэр гаргасан. Ар гэр нь малчин хүмүүс гэхээр ингэж дээрэнгүй хандаж байгаа юм уу. Хэлмэгдүүлэлтээ зогсоохыг шаардаж байна. Шүүхээ хаалттай хийгээд, ингээд яллаж болдог юм уу.Төрийн нууцтай холбоотой гээд байгаа хэрэг нь шалгавал илрэх л хэрэг юм билээ шүү дээ. Түүнээс гадна дүү минь 4,9 жил гэдгийг сонсоод шүүхийн танхимд арга ядахдаа л хэдхэн минутын шууд бичлэг хийсэн байсан. Гэвч үүнийг нь худлаа, жүжиглэж байна гэх мэтээр сэвж байгаад үнэхээр харамсаж байна. Өчигдрөөс хойш дүүг минь харлуулах бүхэл бүтэн тролл баг ажлаад эхэлсэн байна. Тэдгээр хаягууд руу ороод хараарай. Дандаа хуурамч хаягууд байгаа. Малчин бид харахад л ойлгомжтой байна шүү дээ" гэв.