Н.Номтойбаярыг сонгуульд оролцуулах эсэхийг шүүхээр хэлэлцэж байна

"Үндэсний эвсэл"-ийн тэргүүн Н.Номтойбаяр тус эвслийн жагсаалтын нэгдүгээр бичигдсэн билээ. Тэгвэл түүнийг сонгуульд оролцуулах эсэхийг шүүхээр хэлэлцэж байна. Тэрбээр шүүх хурал руу орохын өмнө дараах мэдээллийг өглөө.

Тэрбээр "Энэ удаагийн УИХ-ын сонгуульд Үндэсний эвсэл хуулийн дагуу бүх шаардлагыг хангаж, СЕХ-ноос батламжаа авч оролцох болсон. Нэр дэвшилттэй холбоотойгоор СЕХ-ноос цагдаагийн байгууллагын гаргасан гомдол дээр үндэслэж, хууль зөрчиж Үндэсний эвслийн жагсаалтын нэгдүгээрт бичигдсэн Нямтайширын Номтойбаярыг  миний биеийг хасах нэхэмжлэх гаргасан. Энэхүү нэхэмжлэлийн дагуух шүүх хурал удахгүй эхлэх гэж байна. Энэ бүхэн 2019 оноос эхлэлтэй. Дандаа л зөрүүтэй тогтоол буюу хууль, хүний царай хардаг ийм л шийдвэрүүдийг удаа дараа гаргаж ирсэн. Тухайн үед ХНХ-ын сайдаар ажиллаж байхад гаргасан тогтоол илтэд хууль зөрчиж буруутай гэж үзсэн атлаа бусад өмнөх болон дараа нь ажилласан сайдуудын гаргасан тогтоолыг хуульд нийцэж байх жишээний. Ялгаатай зүйл нь сайдын нэр, он сар өдөр нь өөр болохоос биш хуулийн дагуу гаргасан шийдвэр. 

Үүнээс үүдэлтэйгээр намайг барьж хорьсон. Ингэхдээ СЕХ-ноос намайг бие даан нэр дэвшигчээр бүртгэсний маргааш нь яллагдагчаар татах тогтоол үйлдэж 23 цагийн дотор яллах дүгнэлт үйлдэж үндэслэлгүйгээр барьж, хорьж сонгуульд өрсөлдөх боломжийг минь хаасан. Үүнтэй мөн адил байдлаар буюу хэдийгээр барьж, хориоогүй байгаа ч гэсэн цагдаагийн гаргасан зөрүүтэй хуульд нийцэхгүй тодорхойлолтоор СЕХ шийдвэр гаргасан. Энэ талаар ХЭҮК-оос ч гэсэн дүгнэлт гарч цагдаагийн тодорхойлолт зөрүүтэй болохыг мөн баталлаа. Хууль тогтоомжийн дагуу СЕХ шаардснаар миний бие өөрийн харьяалагдах ХУД-ийн цагдаагийн газраас тодорхойлолт гаргахад "Х.Номтойбаяр авлига, албан тушаалын гэмт хэрэгт холбогдоогүй" гэдэг дүгнэлтийг гаргасан.