Ш.Оюунчимэг: Шүүх хаалттай байх тусмаа хардлага төрүүлнэ

"Зариг" сайтын эрхлэгч Н.Өнөрцэцэгт холбогдох шүүх хурал Баянзүрх, Чингэлтэй, Сүхбаатар дүүргийн Эрүүгийн хэргийн  шүүхэд өнөөдөр 09.00 цагт эхэлсэн. Шүүх хурлыг нээлттэй явуулах хүсэлтийг  Н.Өнөрцэцэг болон түүний өмгөөлөгчид, цаашлаад МСНЭ  шүүхэд гаргасан ч хүлээн авсангүй. 

Н.Өнөрцэцэгийн гэм буруугийн шүүх хуралдааныг өнөөдөр долдугаар сарын 1 хүртэл хойшлууллаа.

Энэ үеэр сэтгүүлч Ш.Оюунчимэг "Сэтгүүлчдийн эрх ихээр зөрчигдөж байгаа учир бид өнөөдөр олуулаа нэгнийхээ эрхийг хамгаалах гээд зогсож байна. Хэн ч гэм буруутай байсан өөрийгөө зөвтгөх эрхийг нь шүүх олгох ёстой шүү дээ. Тэр эрхийг нь л олгож, энэ зарчмаа хангаж өгөөч гэдгийг л хүсэж байгаа юм. Шүүхийн байгууллага нээлттэй байх тусам олон нийт шүүхэд итгэх итгэл сэргэнэ, хаалттай байх тусмаа хардлага төрүүлнэ. Энэ л иргэдийн мэдэх эрх шүү дээ. Үүнийг хангах үүрэг нь хэвлэл мэдээлэл. Тиймээс энэ эрхийг л битгий зөрчөөж гэж шаардаж байна" гэв.