Х.Ганцоож: Ээжийгээ хорт хавдартайг мэдэж байсан ч өөд болчихно гэж санаагүй, ажил бүтэхгүй үед ээжийнхээ дээлийг нөмрөөд унтахаар ажил бүтээд л явчихдаг

“Ээжийн минь дээл” гээд шкафнаасаа гаргаж ирж үнэрлэхдээ тэсэлгүй уйлна. Х.Ганцоожийн ээж дөрвөн жилийн өмнө хорт хавдраар өөд болжээ.

“Миний ээж надтай ижилхэн жижигхэн эмэгтэй байсан. Тэр жил ээжийгээ хорт хавдартайг дуулаад эмчид нь “миний ээжид битгий хэлээрэй” гээд нууж, босоод ирнэ ээ гэж сэтгэлээр дэмжиж байсан. Гурван жил кинонд тоглолгүй, ээжийгээ асарч байхад Бэрх шагай киноныхон дүрийн санал ирүүлсэн. Энэ тухайгаа ээждээ хэлэхэд “ямар гоё юм бэ, миний охин. Ээж нь хоёр зээ охиноо хөтлөөд киноны нээлтэд нь очно оо” гэж байсан ч харж чадаагүй. Ээж минь насны хишгийн 50 мянгаа авахдаа “эмээ нь хоёр зээдээ гоё юм авч өгнө өө, одоо удахгүй буулаашдээ, эмээ нь гоё юм авч өгнө” гэж догдолдог байсан. Хоёр охинд минь “амь” байлаа. Ээжийн минь өрөм, хайлмаг ямар сайхан гээч. Байхгүй болсон хойно нь л хичнээн сайхан байсныг нь улам их мэддэг юм байна. Ажил бүтэхгүй үед ээжийнхээ цэнхэр дээлийг нөмрөөд унтахаар ажил нээх сайхан бүтэмжтэй болоод байх шиг бодогддог” хэмээн ярина. “Энэ миний ээжийн залуугийн зураг” гэж дурсаад, бага охин минь надаас өндөр болчихсон гэж үнэрлэх жүжигчин Х.Ганцоожтой ярилцлаа.

Бичлэгээр үзэх: