7 настай шатарчин Н.Аз-Эрдэнэ дэлхийн аваргын тэмцээнээс 3 алтан медаль хүртлээ

Бүгд Найрамдах Перу улсын нийслэл Лима хотноо болсон 2024 оны Сурагчдын шатрын дэлхийн аварга шалгаруулах тэмцээний охидын ангиллын 3 төрөлд түрүүлж дэлхийн аварга болсон 7 настай шатарчин Н.Аз-Эрдэнэ охиныг Боловсролын сайд Л.Энх-Амгалан хүлээн авч уулзлаа. 

Н.Аз-Эрдэнэ энэ жилийн Сурагчдын шатрын дэлхийн аварга шалгаруулах тэмцээнд өөрийнхөө насанд өрсөлдсөн 40 гаруй хүүхдээс илүүрхэн “блиц”, “рапид”, “стандарт” төрлүүдээс аваргын алтан медалийг хүртсэн юм.
Энэ удаагийн дэлхийн аваргын тэмцээнд 26 орны 1200 сурагч зургаан насны ангиллаар оюун ухаанаа уралдуулж, манай улсаас 11 шатарчин сурагч оролцсон байна. Монгол Улсаа төлөөлөн оролцсон өсвөрийн шатарчдаас хөвгүүдийн ангилалд Б.Учрал найм хожиж, нэг ялагдан, аварга болсон бол U9 насны охидын ангилалд Ч.Нандинжигүүр зургаа хожин, хоёр тэнцэж, алтан медалиар энгэрээ мялаажээ. Харин U15 насны хөвгүүдийн ангилалд Н.Содбилэгт 7.5 оноогоор мөнгө, U13 насны охидын ангилалд Б.Буянхишиг, U11 насны охидын ангилалд М.Урангоо долоон оноогоор хүрэл медалийн эзэн болсон байна. Харин U9 насны хөвгүүдийн ангилалд өрсөлдсөн Б.Бат-Амгалан IV байрт шалгарчээ.
Улс орныхоо нэрийг өндөрт өргөн амжилт үзүүлээд ирсэн өсвөрийн шатарчдын төлөөлөл Н.Аз-Эрдэнэ болон түүний аав, дасгалжуулагч Ч.Нямдаваа нартаа дараа дараагийн тэмцээндээ илүү их амжилт гаргахыг хүсэн ерөөв.

Ч.Нямдаваа Хөвсгөл аймгийн Гэр бүл хүүхэд, залуучуудын хөгжлийн газрын дэргэдэх "Хөх монгол" шатрын клубт дасгалжуулагчаар ажилладаг. Түүний 3 хүүхэд гурвуулаа шатрын спортоор хичээллэдэг гэнэ. Манай шавь нар дунд Аз-Эрдэнээс маань илүү авъяаслаг шатарчин хүүхдүүд олон бий хэмээн бахархан ярих нь урамтай.
Н.Аз-Эрдэнэ охин 4 настайгаасаа шатраар хичээллэжээ. Энэ хугацаанд Монгол Улсын шатрын аварга шалгаруулах тэмцээнд найман удаа оролцож 3 алт, 2 хүрэл медалийн эзэн болж байжээ. Өнгөрсөн жил 6 настайдаа Монгол Улсын шатрын өсвөрийн аварга болж 41 жилийн дараа Хөвсгөл аймаг алтан медалийн буухиаг үргэлжлүүлж байсан бол энэ жил мөн улсын аваргын тэмцээнд 8 настай эгч нартайгаа өрсөлдөн түрүүлсэн байна. Нас өгсөж түрүүлэх нь Монгол Улсын хэмжээнд анхных гэж хэлж болохоор амжилтыг үзүүлсэн авъяаслаг ШАТАРЧИН Н.АЗ-ЭРДЭНЭДЭЭ ХАЛУУН БАЯР ХҮРГЭЕ.