Иргэн Н: “Сална” гэтэл миний хүзүүнд хутга тулгаж зодсон, шийтгэлээ хүлээж гарч ирээд намайг яах бол гэхээс айж байна

Цахим орчинд гэр бүлийн хүчирхийлэлд өртсөн гэх иргэн Н-тэй ярилцлаа. 

“Хонхны баяр болох гээд ангийнхантайгаа уулзтал ангийн эрэгтэй найз руугаа харж инээлээ гэж хардаж сүүлд намайг зодсон. Эхэндээ надтай чанга дуугаар ч харьцдаггүй байсан. Охиноо төрүүлсний дараа үе үе гар далайдаг болчихсон. Яваандаа ил харагдах шархтай зоддог болсон. Тэгээд согтуудаа тасраад зодчихож гээд уучлал гуйгаад цэцэг бариад ирдэг байсан. Хэд хэдэн удаа харж, найдаж, уучилсан. Сүүлдээ эрүүлдээ ч зоддог болсон. Цагдаад дуудлага өгөхөөр “салсан нь дээр дээ, нэг удаа гар хүрсэн л бол болихгүй” гэж зөвлөөд, арга хэмжээ авалгүй явдаг. Сална гэхээр “би чамайг ална, эсвэл чи намайг алчих. Би эсвэл үхнэ гээд цонхон дээр гараад зогсчихдог”. 14 хоногийн өмнө сална гэхэд миний хүзүүнд хутга тулгасан. Охиноо өнчрүүлэхгүй гээд л боддог байтал охин минь гэнэт цочиж, чихээ дарж уйлдаг болчихсон байсан. Охиноо өнчрүүлэхгүй гээд л охиноо давхар зовоож байсан юм билээ. Одоо нөхрийг маань цагдаа шалгаж байгаа, шийтгэл хүлээх л байх. Гэхдээ хэд хоног шийтгэл хүлээж гарчихаад намайг яах бол гэхээс би маш их айж байна. Охиныг маань авна гээд булаацалдаад байгаа, яахаа мэдэхгүй байна”