Гэрч: Биеийн эрч хүч сэргээх эмийг зүрхний эмтэй андуурч, М.Бадарчид өгсөн байж болзошгүй

М.Бадарчийн нэхэмжлэлтэй Спортын арбитрын шүүх хурал болж, улмаар бүрэлдэхүүн түүний барилдах эрхийг сэргээх үндэслэлгүй, допинг хэрэглэсэн нь үнэн гэж үзсэн.

Улмаар,

• Шууд хүлээн зөвшөөрөх
• Эсвэл хаанаас, хэнээс допинг авч хэрэглэснээ мэдэгдэж, хамтран ажиллах хоёр сонголтыг санал болгосон.

Тэгвэл өнөөдөр Спортын арбитраас мэдээлэл хийлээ.

Улмаар "Мэдэгдлийн хариу өчигдөр 17.00 цагт ирсэн. Үүгээр шинэ нөхцөл байдал үүссэн.Тодруулбал, шинээр гэрч гарч ирсэн. Өөрөө хүссэн тул нэрийг нь хэлэх боломжгүй байна. Харин гэрч өөрөө ирж нэхэмжлэлээ авчирч өгсөн.Аль нэг тал гэрч дуудагүй гэсэн үг.

Өргөдлийн агуулга нь: "Миний бие эрүүл мэндийн шалтгааны улмаас 2023 оны зургадугаар сараас есдүгээр сар хүртэл өөрийн биеийн онцлог байдлыг харгалзан үзэж Турк улсаас биеийн эрч хүч сэргээх, метанолин бодис орсон 50 ширхэг эмийг өдрийн 2-оор дөрвөн таблетка ууж хэрэглэсэн. Энэ хугацаандаа бэлтгэлийн явцад панангинтэй андуурч, М.Бадарчид өгсөн байж болзошгүй гэж бодож байна. Иймд энэ эргэлзээтэй асуудлыг нэг тийш нь  шийдэх зорилгоор, өөрийн хүсэлтээр гэрчээр оролцох хүсэлтэй байна "гэжээ.

Улмаар лабораторын шинжилгээний дүгнэлт, эмийн зураг, иргэний үнэмлэхийг өргөдөлд хавсарган ирүүлсэн.  Дүрмийн дагуу, 17.13-ын дагуу гэрч өөрөө оролцох хүсэлт гаргасан, шийдвэр эцэслэн гараагүй байгаа тул хуралдааныг дахин үргэлжлүүлэхээр боллоо.

Гэрчээр оролцох хүн нь хуралдааныг өөрөө хаалттай хийхийг хүссэн. Улмаар нээлттэй эсвэл хаалттай хуралдаан явуулахыг санал хураалтаар шийдвэрлэхэд улмаар нээлттэй явуулж байна.
Гэрч бүрэлдэхүүнд тайлбар, мэдээллээ өгч байна.