Х.Ганхуяг: Банкны монополыг задлах асуудалд иргэд хэрсүү хандана гэдэгт итгэж байна

Банкны тухай хуулийг 2021 онд шинэчлэн баталсан. Уг хуульд банкнуудыг нээлттэй хувьцаат компани болгох, гол хувьцаа эзэмшигч нь 20 хүртэлх хувийг эзэмших, банкнууд банкнаас бусад салбарт үйл ажиллагаа эрхлэхийг хориглохоор заасан юм. Ингэснээр банкнууд хадгаламжийн болон татвар төлөгчдийн мөнгөөр бизнес эрхэлдэг байдлыг халж, монопол буюу ноёрхлыг задлах, хувьцаа эзэмшигчид банкны үйл ажиллагаанд хяналт тавих, аль нэг хувьцаа эзэмшигч ганцаараа шийдвэр гаргахыг хязгаарлах зэрэг боломж бүрджээ.

Энэ талаар Монгол Улсын Их Хурлын гишүүн Х.Ганхуяг “Сүүлийн 30-аад жилийн хугацаанд манай улсын эдийн засаг, бизнесийн салбарт тодорхой тооны монополууд бий болсон. Үүний нэг илрэл болох банкны хүү өндөр байгаагийн шалтгаан нь цөөн тооны банкны монопол юм. Монополыг задлах гэхээр эсэргүүцэл, дургүйцэл ихээр гардаг. Үүнд иргэд, олон нийт хэрсүү хандана гэдэгт итгэж байна” гэв.

Банкны тухай хуулийн шинэчилсэн найруулга хэрэгжиж эхэлснээр системийн нөлөө бүхий таван банк буюу Төрийн банк, Хаан банк, Хас банк, Худалдаа хөгжлийн банк, Голомт банк нээлттэй хувьцаат компани болсон бөгөөд энэ онд багтаан хувьцааг 20 хүртэл хувиар задлах юм.