Иргэд хямд үнэтэй гурил идэх боломжтой боллоо

Засгийн газраас өргөн барьсан гурван ч хуулийн төслийг өнөөдөр //2024.04.19/ УИХ-ын чуулганы нэгдсэн хуралдаанаар баталлаа.

Тодруулбал, Баялгийн сангийн тухай хууль, Гурил, малын тэжээлийн импортын татварыг тэглэх хуулийн төсөл мөн малчдад 50 сая төгрөг хүртэлх зээл олгож улмаар хоршооллыг байгуулах хуулийн төслүүд тус тус батлагдлаа.  Гурил, малын тэжээлийн импортын татварыг тэглэх хуулийн төсөл батлагдснаар ард иргэд хямд үнэтэй гурил идэх нөхцөл бүрдэх юм. 

 “50кг-ын нэг шуудай 1-р гурил 120-130 мянган төгрөгөөр борлуулагдаж байгаа нь малчид төдийгүй нийт ард иргэдэд дарамт болж байгаа учраас улаан буудайн баяжуулсан гурилыг импортлоход гаалийн албан татвараас чөлөөлөхөөр хуулийн төслийн оруулж ирэх шаардлага бий болсон гэдгийг хууль санаачлагч ЗГХЭГ-ын дарга Д.Амарбаясгалан хэлж байв. 

Өөрөөр хэлбэл, өнөөдөр 2,600-3,000 төгрөгийн үнэтэй зарагдаж буй нэгдүгээр гурил өрсөлдөөн бий болсны үндсэн дээр 1,600 төгрөгөөр хэтрэхгүй үнээр зарагдах боломжтой буюу 50 кг-ын шуудай гурилыг 70-80 мянган төгрөгөөр худалдан авах боломжтой юм. 

Хоёр дахь батлагдсан чухал хууль нь мал аж ахуйн салбарыг шинэчлэх буюу "Уламжлалт мал аж ахуйд тулгамдаж байгаа уур амьсгалын өөрчлөлтөөс шалтгаалсан сөрөг нөлөөллийг бууруулах тухай" хуулийн төслийг УИХ баталлаа. 

Ийнхүү тус хуулийн төсөл батлагдсанаар Засгийн газраас "Шинэ хоршоо-Чинээлэг малчин" хөтөлбөрийг хэрэгжүүлэх юм. Тус хөтөлбөр таванжилийн хугацаанд хэрэгжиж, хоршооны гишүүн малчин Зээлийн батлан даалтын сангийн 80-100 хувийн батлан даалтаар 50 сая хүртэлх зээл авах боломж бүрдэх юм. Тодруулбал, барьцаа хөрөнгөгүй малчин 20 сая төгрөг хүртэлх зээл авахад Зээлийн батлан даалтын сан 100 хувь батлан даана.

Ингэснээр малчид хоршсон байдлаар баг, сумынхаа түвшинд мах нядалгааны, арьс ширний зэрэг анхан шатны боловсруулалт хийдэг цехтэй болж, нэмүү өртөг шингэсэн үнээр бүтээгдэхүүнээ зах зээлд нийлүүлдэг болно гэдгийг ЗГХЭГ-ын дарга онцолж байлаа.