Үндэсний баялгийн сангийн тухай хуулийг баталлаа

УИХ-ын чуулганы нэгдсэн хуралдаанаар Үндэсний баялгийн сангийн тухай хуулийн төслийг баталлаа. 

Тус хуулийн төслүүдийг Засгийн газар энэ сарын 4-нд яаралтай горимоор өргөн барьсан юм. Ийнхүү хуулийн төсөл батлагдснаар газрын хэвлийн баялгийн үр өгөөжөөс улсын төсөвт төвлөрсөн орлогыг одоо ба ирээдүй үеийн Монгол Улсын иргэн бүрд тэгш, шударга хүртээх зорилгоор Үндэсний баялгийн санг байгуулах, сангийн эх үүсвэр, төрөл, зориулалтыг тодорхойлох, сангийн хөрөнгийг удирдах бүтэц, зохион байгуулалтыг тогтоох, үйл ажиллагааг тайлагнах болон хяналт тавих харилцааг зохицуулах зорилготой юм.

Үндэсний баялгийн сан нь Ирээдүйн өв сан, Тогтворжуулалтын сан, Хөгжлийн сан, Хуримтлалын нэгдсэн сангуудаас бүрдэх бөгөөд сангийн хөрөнгийг арвижуулах, хөрөнгө оруулалтыг татах, ирээдүйн үр өгөөжийг нэмэгдүүлэх чиглэлээр ажиллах Норвегийн баялгийн сангийн жишиг загварт тулгуурлан байгуулахаар тохиролцлоо. “Эрдэнэс Монгол”-ын харьяа стратегийн ордуудын 34 хувь, тодотгож хэлбэл Эрдэнэт үйлдвэр, Эрдэнэс Оюу Толгой, цаашид ашиглах ордуудын ашиг Хуримтлалын нэгдсэн санд шууд төвлөрч, иргэдийн орон сууц, боловсрол, эрүүл мэндэд зарцуулахаар тусгасан. 

Санал хураалтад 40 гишүүн оролцож 39 гишүүн дэмжсэнээр хуулийг эцэслэн батлав.

Ерөнхий сайд Л.Оюун-Эрдэнэ энэ үеэр "Үндэсний баялгийн сангийн тухай хууль дээр парламентад суудалтай улс төрийн намууд санал нэгдэж, санамж бичигт гарын үсэг зурсан. АН-ын дарга Л.Гантөмөр, ХҮН-ын дарга Т.Доржханд нарт талархал илэрхийлж байна. Баялаг, эдийн засаг хүртээмжтэй байх суурь зарчмаа баталж байна гэсэн үг. Хэдийгээр хуудасны хувьд нимгэн ч агуулгын хувьд маш том. Ирээдүйн өв сан бол үржүүлэхийн хүрд байх эрх энэ хууль батлагдсанаар нээгдэж байна. Нэг гэр бүл стратегийн ордыг ашиглаад явах боломж энэ хуулиар хаагдаж байна. Өв залгамжилж байгаа тохиолдолд 30 хүртэлх хувийн татвар төлнө. Бусад оронд энэ бол 80 хүртэлх байдаг.Энэ хуулийг Цэц дээр унагах хүсэлтэй хүмүүс байгаа. Энэ бол хэдхэн гэр бүл. Монголын бүх баялаг дээр эзэн суусан хүмүүс энэ давуу байдал, ил тод байдлыг хийлгэхгүйн төлөө нэгдэх болно" гэлээ.