126: АН-ын дэд дарга, Хуульч О.Алтангэрэл УИХ-ын сонгуулийн нэгдүгээр тойрогт хүч үзнэ

Монгол Улсад нүүрлэсэн төрийн хулгай, луйврыг таслан зогсоож чадвал Хуульч мэргэжилдээ үнэнч яваагийн минь утга учир тэр хэмээн, өөрийн зорилгоо тодорхойлсон АН-ын дэд дарга, хуульч өмгөөлөгч О.Алтангэрэл 2024 оны УИХ-ын сонгуульд нэгдүгээр тойрогт хүч үзэхээр болжээ. Түүний тухайд 2020 оны УИХ-ын сонгуулиар Өвөрхангай аймагт нэр дэвшиж 18 мянга орчим иргэдийн санал авч байжээ. Тийм ч учраас энэ удаад Баянхонгор, Өвөрхангай, Архангайн тойргийг боломжит хувилбар гэж тооцсон бололтой.

Оюунсайханы Алтангэрэл нь хууль зүйн салбарт 24 дэх жилдээ ажиллаж байгаа. Өнгөрсөн хугацаанд хүний эрхийн асуудал дээр түлхүү анхаарал хандуулан ажиллаж ирсэн.Төлбөрийн чадваргүй иргэдэд хууль зүйн туслалцаа үзүүлэх бүтцийг Монгол Улсад анх удаа бий болгоход гар бие оролцож, амжилттай хэрэгжүүлсэн байдаг.

Авлигын чиглэлээрх 10 жилийн судалгаа шинжилгээндээ үндэслэж Хууль бус хөрөнгийг хураах тухай хуулийн төсөл боловсруулж байсан. 

Сүүлийн үед ялын бодлогыг чангаруулах асуудлыг дэмжин дугарах болсон.  Ялангуяа  авлига албан тушаал, бага насны хүүхдийн эсрэг үйлдсэн гэмт хэрэг дээр ялын бодлогыг чангаруулах нь зөв хэмээн үздэг нэгэн.

Тэрээр, Шүүхийн шийдвэр гүйцэтгэх ерөнхий газарт,  Сургалтын офицероор ажлын гараагаа эхэлсэн бөгөөд Шүүхийн ёс зүйн хорооны дарга, Хууль зүйн яамны газрын дарга, Ардчилал судлалын хүрээлэнгийн захирал зэрэг албан тушаал хашиж байсан юм.

Хууль зүйн шинжлэх ухааны чиглэлээр 20 гаруй ном, гарын авлага, эрдэм шинжилгээний бүтээлийг бие даан болон хамтран туурвиж байсан удаатай.