Сэлэнгэ аймгийн ОБГ: Ц.Гансүхийг хайхад бэлэн байгаа ч уул руу цас их тул хайлт үр дүнгүй байх эрсдэлтэй байна

Самарт явсан 33 настай Ц.Гансүх гэх залуу өнгөрсөн оны 11-р сараас хойш таван сарын турш ор сураггүй алга болоод байна.  Ц.Гансүхийн төрсөн эгчийн хэлж байгаагаар отгоосоо "утсаар ярьчихаад ирье" гэж гараад сураггүй болсон. Энэхүү хэрэгт хамт ууланд самарт явсан иргэдийг сэжиглэж байгаа гэдгээ мэдэгдсэн. Дөрвөн хүүхдийн аав Ц.Гансүхийг эрэн хайх боломжтой эсэхийг бид Сэлэнгэ аймгийн Мандал сумын ОБГ-аас тодрууллаа. 

Сэлэнгэ аймгийн Мандал сумын ОБГ-ын Гамшгаас хамгаалах улсын хяналтын ахлах байцаагч Б.Бат-Эрдэнэ: "Бидэнд 11-р сард ар гэрийнхэн нь хүсэлт тавьсны дагуу 11-р сардаа хоёр удаа хайсан. Мандал сумын Онцгой байдлын хэлтэс, Бугант болон Мандал сумын Цагдаагийн хэлтэс, сайн дурын иргэд гээд 20 гаруй техник хэрэгсэлтэй долоо хоног хайсан. Үр дүнд хүрээгүй. Мөн дараа нь бид өөр маршрут гаргаад хайсан ч мөн л хайлт үр дүнд хүрээгүй. Эхний хоёр удаагийн хайлтын төсвийг аймаг орон нутгийн Засаг даргаас гаргасан. Хэдхэн хоногийн өмнө алга болсон залуугийн ар гэрийнхэн ирж дахин хайлт хийж өгөөч гэж хүсэлт тавьсан. Мөн хайхад хүн хүч, техник хэрэгсэл явах учраас үүнийгээ дагаад төсөв мөнгө хэрэгтэй. Ар гэрийнхэн нь хайлтын зардал мөнгөө олох гээд Аймгийн засаг даргад хүсэлт өгсөн юм билээ. Ц.Гансүхийг самарт авч явсан иргэдээс Цагдаагийн байгууллага байцаалт авсан. Үнэхээр сураггүй алга болсон юм байна гэж дүгнэсэн учраас эрэн хайх шаардлагатай байгаа юм. Харамсалтай нь хайлт хийхэд одоогоор хүндрэлтэй байна. Учир нь тухайн залуугийн алга болсон газарт машин явах боломжгүй нөхцөл байдалтай байна. Энэ өвөл цас ихтэй байсан учраас одоо болтол цас хайлаагүй, дээрээс нь шавар шалбааг маш их байна. Ийм нөхцөлд эрэн хайхад үр дүн муутай байх учраас цас нь багасахаар эрлийн ажиллагаа зохион байгуулах төлөвлөгөөтэй байна. Цагдаагийн байгууллагаас эрэн хайх ажиллагаа зохион байгуулах хүсэлт ирмэгц хаймаар байгаа ч одоо бол эрэл үр дүнгүй байх магадлалтай байна. Бид нар алга болсон залуугийн байх магадлалтай газруудыг гаргасан байгаа. Өмнөх хайлт хийсэн хоёр газраа хараад дараагийн төлөвлөлтөө хийчихсэн. Хүн хүч бол бэлэн байгаа ч байгалийн хүчин зүйл нөлөөлөж байна" гэв.

Бид уг асуудлаар Цагдаагийн байгууллагаас тодруулан хүргэх болно.