Худалдагч: Гурилын үнээ хамгийн их нэмдэг нь "Алтан тариа" гэдэг заваан газар

Засгийн газраас малын тэжээл болон улаан буудайн баяжуулсан гурилыг импортлоход гаалийн албан татвараас чөлөөлөхөөр хуулийн төслийг боловсруулж, УИХ-аар хэлэлцүүлэхээр болсон. 

Малчид зуд зурхантай хүнд байгаа энэ үед гол хэрэглээ нь болсон гурилын үнэ өндөр байгаа нь малчдад улам дарамт бий болгож байна. Иймд "Импортын сувгаа нээнэ" гэдгийг ЗГХЭГ-ын дарга Д.Амарбаясгалан мэдэгдсэн. Мөн түүнчлэн тэрбээр  "...1 кг улаан буудайг 700₮ авдаг. Гурилын үнийн 90% нь улаан буудайн үнэ.Нэг кг гурилаа 2800₮ болгож зардаг. Дөрөв нугалсан бизнес хийдэг мөлжигчид нийгэмд төрийн эрх мэдлээ ашиглаж өрсөлдөөнөө үгүй хийдэг нь үнэн. Импортын татвар тавьж, квот тогтоодог. Квотоор орох гурилын хэмжээ хугацааг мэддэг, тааруулаад үйлдвэрлэлээ багасгадаг. Энэ бол луйвар" гэж сошил орчинд мэдээлсэн. 

Зах худалдааны төвүүдэд гурилын үнэ ямар байгааг сурвалжлахад, өнөөдрийн байдлаар нийслэлийн хүнсний томоохон зах, дэлгүүрт “Алтан тариа” савласан нэг кг гурилын үнэ дээд зэрэг нь 2800-3100 төгрөг, 1-р зэргийнх 2200-2600 төгрөг, 2-р зэргийнх 1489-1800 төгрөг байна.

Худалдан авагч олон байдаг “Хүчит шонхор”, “Таван эрдэнэ”, “Бөмбөгөр”, “Баянзүрх”, “Хархорин” хүнсний захуудад задгайгаар буюу шуудайгаар худалдаж буй нэг кг дээд зэргийн “Алтан тариа” гурилын үнэ 2520-аас 2800 төгрөгийн үнэ ханштай байна. Харин “Барс” хүнсний захад дээд зэргийн “Алтан тариа” гурил 2520 төгрөг, 1-р зэргийн гурил 2120 төгрөгөөр тус тус зарагдаж байна.