Б.Ариунбилэг: Хуримаа хийгээд хөл дээрээ гүйж байна гэж зүүдэлдэг байлаа

“Би яагаад хөл дээрээ ганц удаа зогсож чаддаггүй юм бол гэж бага байхдаа их боддог байсан. Хааяа хөл дээрээ гүйгээд л хуримаа хийж байна гэж зүүдэлнэ. Тэгээд хэзээ ч биелэхгүй зүүд зүүдлэх юм гэж өөрийгөө зэмлэнэ. Би 20 нас хүрэхээсээ өмнө юу юу хийж үзсэн байх вэ гэдгээ 16 настайдаа цаасан дээр буулгаж байсан. Азаар бүгдийг нь биелүүлчихсэн. Спортоор хичээллэх, зургийн үзэсгэлэнгээ гаргах, олон бээр аялах гээд. Бүгдийг нь биелүүлсэн, Герман улсад болсон тусгай олимпод Монголоо төлөөлж оролцоод bocce ball-ийн төрөлд хүрэл медальтай ирсэн. Амьдрал л юм болохоор хүмүүс муухай үг ч хэлнэ. Нэг удаа тэргэнцэртэйгээ дэлгүүрт байж байтал нэг хүүхэд дуудахаар нь эргээд хартал амьд үхдэл минь гэж хэлсэн. Тэр үг л миний бодлоос огт гардаггүй. Би өнгөрсөн 6 сард 12-р ангиа төгссөн. Одоо Сэтгэлзүйчээр сурахаар ЭЕШ-даа бэлдэж байна. Энэ бүх нийгмийн амьдралд оролцуулж намайг бүтээсэн хүмүүс бол миний гэр бүлийнхэн".
Б.Ариунбилэгийг төрснөөс хойш ээж нь ажлаа орхиж охиноо 20 жил асарч, нийгэмд өөрийгөө авч явах чадвартай нэгэн болгон өсгөжээ. Энэ удаад бид бэрхшээлийг даван туулж яваа Б.Ариунбилэгийг онцоллоо.

Бичлэгээр үзэх: