Т.Баярхүү: ОБЕГ-т 1.9 тэрбум төгрөгийн бэлэн мөнгө, 773 орчим сая төгрөгийн бараа хандивласан

Улсын онцгой комиссоос өнөөдөр /2024.03.01/ ээлжит мэдээллээ хийлээ.

УОК-ын Нарийн бичгийн дарга, хурандаа Т.Баярхүү: "Нийт 11 аймгийн 46 суманд ам бүл цөөтэй, хүн хүчний дэмжлэг шаардлагатай айлуудын мэдээллийг цуглуулан гаргаж, ажиллах шаардлагатай албан хаагчдыг томилсон. Одоогийн  байдлаар Зэвсэгт хүчний 214 алба хаагч 21 нэгж техниктэйгээр хаваржилтын нөхцөл байдал хүндэрсэн Сүхбаатар, Дорнод, Төв аймгийн сумдуудад үүрэг гүйцэтгэж эхэлсэн. Аймаг, сумын онцгой комисс өвөлжилт хүндэрсэн 12 аймгийн Гамшгаас хамгаалах орон нутгийн алба, мэргэжлийн ангиас 2695 малчин өрхийг түлээ түлшээр хангаж, 3614 малчин өрхөд эрүүл мэндийн тусламж үзүүлж, 424 өрхөд хоол хүнсний тусламж хүргүүлсэн. Нийтдээ 37.754 өрхөд 102 мянган боодол өвс, 48.392 малчин өрхөд 1500 тонн тэжээл хүргэсэн. "Малчдад туслах" аяныг улс даяар зохион байгуулж, өнөөдрийн байдлаар 33 иргэн, 55 аж ахуйн нэгж байгууллагаас нийт 1.9 тэрбум төгрөгийн бэлэн мөнгө, 773 орчим сая төгрөгийн үнэлгээ бүхий бараа материалыг УОК-т хандивлаад байна. Эхний ээлжид УОК-т хандивласан бараа материалыг хоёр дахь ээлжийн хүнсний тусламжтай цуг орон нутаг руу хүргэх ажлыг өнөөдрөөс эхлэн зохион байгуулж байна" гэлээ.