Малчдын зээлийг хойшлуулахаар боллоо

Засгийн газрын 286 дугаар тогтоолын дагуу зудын байдалд үнэлгээ хийхэд таван аймгийн 21 суманд цасны нягт 0,35-1,05 г/см3 хүрч төмөр буюу шилэн зудын, 17 аймгийн 89 суманд цагаан зудын, 17 аймгийн 82 сум цагаанаар зудархуу нөхцөлд байна.
Улсын хэмжээнд хоёрдугаар сарын 19-ний байдлаар 667.500 мал хорогдсон. Сүхбаатар, Хэнтий, Дорноговь, Архангай, Дорнод зэрэг аймагт хорогдол ихтэй байна.

Засгийн газрын сайд нар орон нутагт ажиллаж буй. Өчигдөр Дундговь аймагт Шадар сайд С.Амарсайхан ажиллах үеэрээ  малчдын зээлийг хойшлуулах асуудлыг хөндөхөө илэрхийлсэн. Тэгвэл энэ дагуу тэрбээр өнөөдөр /2024.02.20/ Төв банк болон арилжааны банкуудын төлөөлөлтэй уулзжээ. 

Тус уулзалтаар нийт 140 мянга гаруй малчны 1,2 их наяд төгрөгийн зээлийн эргэн төлөлтийг хойшлуулахаар зөвшилцөлд хүрчээ. 

Банкуудын хэрэглээний зээл өнгөрсөн оноос 41.3 хувиар өссөний 3.4 нэгж хувийг малчны зээл бүрдүүлдэг байна. Малчны зээл нийт хэрэглээний зээлийн 14.4 хувь бүрдүүлж байгаа ба өмнөх оны мөн үеэс 20.4 хувиар нэмэгдэж 1.2 их наяд төгрөгт хүрчээ. Малчны зээлийн чанаргүй зээл 10.4 тэрбум төгрөг байгаа ба малчны зээлд эзлэх жин 0.9 хувь байгаа нь өмнөх оны мөн үеэс 0.3 нэгж хувиар нэмэгджээ. 

Нийт малчны зээлийн үлдэгдлийн 48.5 хувийг Хаан банк, 51.2 хувийг Төрийн банк тус тус бүрдүүлж байна. 

Сард дунджаар 83 тэрбум орчим төгрөгийн зээлийг малчид авдаг бөгөөд цагаан сар, ноолуур болон хичээл  сургуулийн бэлтгэл ажилтай холбоотойгоор тухайн саруудад малчны зээлийн хэмжээ нэмэгддэг аж.