Н.Баатаржав: Манай жолооч 40 жил том машин барьсан, бид жолоочоо эцсийн мөч хүртэл хамгаална

"Дашваанжил" ХХК-аас үүсээд байгаа нөхцөл байдалтай холбогдуулан хэвлэлийн хурал зохион байгууллаа. Мэдээллийн эхэнд "Дашваанжил" ХХК-ийн төлөөллүүд амиа алдсан гурван аврагчийн ар гэр, найз нөхдөд эмгэнэл илэрхийллээ.

"Дашваанжил" ХХК-ийн ерөнхий захирал Н.Баатаржав "Манай компанийн жолооч Д.Рэнцэндорж 2019 оноос хойш манай компанид ажиллаж байгаа 62 настай, архи, тамхи хэрэглэдэггүй, онц тээвэрчин,  шилдэг ажилтан. 

Гэнэтийн давагдашгүй хүчин зүйл гарлаа гэж хэлнэ. Үүнд маш их харамсаж байна. Та бүхэн уг нөхцөл байдлыг шалгагдаж дуусах хүртэл буруу ташаа мэдээлэл битгий хийгээрэй гэж хүсэх байна. 

Манай компанийн хувьд монголдоо анх удаа олон улсын жишигт нийцсэн хийн хангамжийн сүлжээг байгуулж 21 аймаг 30 гаруй суманд хий хадгалах байгууламжийг байгуулсан. Хэдий амжилттай үйл ажиллагаа явуулж байсан ч уг осол бидэнд том цочрол өглөө. Маш их харамсаж байна. Бид хамгийн сайн тээврийн автомашин авч, стандартын шаардлага хангаж ажилладаг. Осолдсон машин тодорхой заасан чиглэл, маршрутын дагуу 15.7 тн хий тээвэрлэлтийг шөнийн цагаар хийж байсан. Хэрэв буруутай нь тогтоогдвол бид хуулийн дагуу хариуцлагаа хүлээхэд бэлэн.  Жолоочийн асуудлыг компанийн зүгээс бүрэн хариуцна.

Жолоочийн хувьд аюултай ачаа тээвэрлэх зөвшөөрөлтэй, бүх стандарт бичиг баримттай байсан. Хий тархсан тохиолдолд ямар нэг газраас оч үсэрч байж гал гарна гэсэн үг. Энд хэн нэгнийг буруутгах гэсэнгүй. Бичлэгээх харахад манай жолооч тайван явж байсан. Хэргийг шалгаж дуустал газны талаар ташаа мэдээлэл түгээхгүй байхыг хүсч байна. Дэлхийн бүх л газар газ ашиглаж байгаа. Цаашдаа бид экспортод чухал ач холбогдолтой байх газыг илүү түлхүү хэрэглэж байж утаанаасаа салах учиртай. Болсон үйл явдалд гүнээ харамсаж буйгаа дахин дахин илэрхийлье" гэсэн юм.