Дорнод аймагт нийтийн байр шатжээ

Дорнод аймгийн Хэрлэн сумын 3 дугаар баг Наадмын талбайн хойно байрлах 20х50 метрийн хэмжээтэй "Нийтийн байр"-нд гал гарч байна гэсэн дуудлагыг 2024.01.24-ний өдрийн 19:01 цагт 101 дугаарт хүлээн авсан.
Дуудлагын дагуу Гал түймэр унтраах, аврах 52 дугаар ангийн 15 алба хаагч, 3 автомашин, Эрэн хайх, аврах ангийн 6 алба хаагч, 1 автомашин, Цагдаагийн газрын 4 алба хаагч, 1 автомашин, “Дорнод бүсийн эрчим хүчний систем” ТӨХК-ий Цахилгаан шугам сүлжээний цехийн 4 ажилтан, 1 автомашин, нийт 29 хүн, 5 автомашинтай ажиллаж 22:05 цагт галын тархалтыг зогсоосон.
Алба хаагчид задаргаа хийж галыг бүрэн унтраахаар ажиллаж байна. Тус байранд 2 айл амьдарч байсан ба гал түймэрт өртсөн иргэн байхгүй.

Улаанбаатар хот, Баянзүрх дүүрэг 23 дугаар хороо байшин шатаж байна гэсэн дуудлагыг 01.24-ний өдрийн 20:30 цагт хүлээн авсан.Тус дүүргийн Онцгой байдлын хэлтсийн Гал түймэр унтраах, аврах 35 дугаар ангийн алба хаагчдыг очиход иргэн У-ийн 9х9 метрийн хэмжээтэй байшингийн дээвэр хэсэг шатаж байсныг унтраасан.

Хөвсгөл аймаг, Алаг-Эрдэнэ сум Хатгал тосгоны 6 дугаар баг байшин шатаж байна гэсэн дуудлагыг 01.25-ны өдрийн 00:48 цагт  хүлээн авсан. Тус аймгийн Онцгой байдлын газрын Хатгал тосгон дахь Гал түймэр унтраах, аврах 69 дүгээр ангийн алба хаагчдыг очиход иргэн Х-ын 4х5 метрийн хэмжээтэй байшин, эд хогшил бүрэн шатаж байсныг ажиллаж унтраасан.

Улаанбаатар хот, Сонгинохайрхан дүүрэг 8 дугаар хороо байшин шатаж байна гэсэн дуудлагыг 01.25-ны өдрийн 05:17 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 29 дүгээр ангийн алба хаагчдыг очиход иргэн Ө-ын 9х4 метрийн хэмжээтэй байшингийн дотор, эд хогшил шатаж байсныг ажиллаж унтраасан.