Хуульч Л.Цог, Ц.Оюунбаатар нарыг “Хүний эрхийн төлөө хүндэт тэмдэг”-ээр шагналаа

Монгол Улсад шинэ Үндсэн хууль батлагдсаны түүхэн өдрийг тохиолдуулан Хүний эрхийн Үндэсний Комиссын даргын тушаалаар Логийн Цог, Цэрэндашийн Оюунбаатар нарын хүний эрхийг хангах, хамгаалах, хөхиүлэн дэмжих үйлсэд оруулсан хувь нэмрийг үнэлэн Комиссын нэрэмжит шагнал болох “Хүний эрхийн төлөө хүндэт тэмдэг”-ээр шагналаа.

1. Хуульч Л.Цог нь 1992 оны шинэ ардчилсан Үндсэн хуулийн “Хүний эрх, эрх чөлөө”, “Монгол Улсын төрийн байгуулал” бүлгийг боловсруулах ажлын хэсгийг ахлагчаар ажиллаж, батлалцсан түүхэн гавъяа байгуулсан. 

Монгол Улсад анхны чөлөөт сонгууль 1990 оны долдугаар сард явагдаж, түүний үр дүнгээр шинэ парламент, шинэ Засгийн газар байгуулагдсан юм. Тухайн үед Монгол Улсын анхны Ерөнхийлөгч П.Очирбатаар ахлуулсан 20 гишүүнээс бүрдсэн Үндсэн хууль боловсруулах ажлыг зохион байгуулах комиссоос дөрвөн ажлын хэсэг байгуулсны нэг нь Улсын Бага Хурлын Хууль зүйн байнгын хорооны дарга Л.Цогоор ахлуулсан, 11 гишүүнтэй Хүний эрхийн ажлын хэсэг байв.

Үндсэн хууль боловсруулах үйл явц нь анхны төслийг боловсруулах, түүнийг Улсын Бага Хурлаар хэлэлцүүлж батлуулах, улмаар Ардын Их Хурлаар батлах зэрэг үе шаттай байхаар төлөвлөж ажилласан байдаг. Ингэхдээ хүний эрхийг ноцтой зөрчиж байсан өмнөх нийгмээс сургамж авч, Монгол Улсын нэгдэн орсон Олон улсын гэрээ, конвенц, пактуудыг мөрдлөг болгож ажилласнаар Монгол Улсад хүний эрх, эрх чөлөөг хангаж, хамгаалах хууль, эрх зүйн тогтолцоо бүрдэх үндэс суурь тавигдсан юм.

2. Хүний эрхийн хуульч Ц.Оюунбаатар нь хүний эрхийн чиглэлээр 35 жилийн хугацаанд судалгаа, эрдэм шинжилгээний ажил эрхэлсэн бөгөөд Хүний эрхийн Үндэсний Комиссын тухай хуулийн төслийг боловсруулах ажлын хэсгийг ахлан ажиллаж, УИХ-ын нэгдсэн чуулганд өргөн барьж, батлуулсан.

Тэрбээр Монгол Улсын төр, засаг, нийгмийн салбарт 45 жил үр бүтээлтэй хөдөлмөрлөсний дотор Төрийн дээд эрх бүхий хууль тогтоох байгууллага болон хуулийн хэрэгжилтийг хангах төрийн чиг үүрэг бүхий байгууллагад хүний эрхийн хуульчаар ажилласны зэрэгцээ нам, улс төр, иргэний нийгмийн 10 гаруй байгууллагын үзэл баримтлал, бодлого үйл ажиллагааны төлөвшилтийг хангаж ажилласан юм.