Ондилт баг баруун бүсийн аваргын төлөө Сүхбаатар багтай тоглохоор боллоо

МСБХ-ны М Хөгжлийн Лигийн эрэгтэй плей-оффын эхний шатанд учраа таарсан Ондилт болон Ундарга Knights багуудын цувралд Ондилт баг 3:0 харьцаатай буулган авч  баруун бүсийн шигшээд шалгараад байна.

Цувралын 3 дах тоглолтонд Ундарга Knights багийн хувьд хожигдох эрхгүй чухал тоглолт байсан. Тиймдээ ч Ундарга Knights баг эхний хагасыг 10 гаруй онооны илүү дуусгаж чадсан. Гэсэн хэдий ч 3-р үеэс эхлэн Ондилт баг эргэн ирэлт хийж 4-р үед 2 багийн оноо тэнцүү эхэлсэн. Эцсийн шүгэл үлээх хүртэл өрсөлдөөнтэй тоглолтыг үзүүлж сүүлийн 10 секунданд Ондилт багийн довтлогч Ө.Мэндсайхан хожлын шидэлтийг амжилттай болгосноор 73-71 харьцаатай ялалт байгуулж улмаар дараагийн шатанд шалгарсан юм.

Тус тоглолтонд Ондилт багаас Ө.Мэндсайхан 19 оноо 7 самбар авч багаа тэргүүлсэн бол  багийн хамтрагч З.Энх-Учрал 13 оноо 7 самбар авсан байна.

Ондилт баг баруун бүсийн аваргын төлөө Сүхбаатар багтай тоглох бөгөөд цувралын эхний тоглолт 1-р  сарын 6-ны Бямба гарагт 17:00 цагаас Спортын Төв Ордонд явагдах юм.