​Ипотекийн зээлийн 8 хувийг 6 хувь руу шилжүүлэхэд УИХ-аас шийдвэр гарах ёстой

УИХ-ын чуулганы өнөөдрийн нэгдсэн хуралдаанаар Төрөөс мөнгөний бодлогын талаар 2024 онд баримтлах үндсэн чиглэл батлах тухай УИХ-ын тогтоолын төслийн анхны хэлэлцүүлгийг хийж байна. Энэ үеэр УИХ-ын гишүүн Э.Батшугар Ипотекийн зээлийг 6 хувь руу оруулахад талаар асуулт асуулаа.

 УИХ-ын гишүүн Э.БАТШУГАР:

• Ипотекийн зээлийг 8 хувиас 6 хувь руу болгох асуудалд Монголбанк идэвхтэй ажилламаар байна. Би Монголбанкны дэд ерөнхийлөгчөөр 2013 онд ажиллаж байхдаа 21 мянган иргэдийг 24 хувийн хүүг 8 хувь руу буулгасан. Эцсийн үр дүнд арт түмэн хожиж байгаа юм. Монголбанкны алдагдал бол бодлогын алдагдал, ашгийн бус байгууллага. Ипотекийн 8 хувийн зээлийг 6 хувь руу шилжүүлэхэд 400 гаруй тэрбум шаардлагатай гэж байсан.

Монголбанкны ерөнхийлөгч Б.ЛХАГВАСҮРЭН:

• Ипотекийн зээл 8 хувьтай явж байгаад 2020 оны аравдугаар сарын нэгнээс 6 хувийн шинэ хөтөлбөр лүү шилжсэн. Энэ хооронд хүүний зөруу гарсан. 8 хувийн зээл авсан иргэдийг 6 хувь рүу шилжүүлэхэд хүүний зөрүүг мэдээж хэн нэгэн даах ёстой. Монголбанк ашгийн төлөө биш. Монголбанк өөрөө хуультай. Монголбанкин дээр үүссэн алдагдлыг ямар нэг юмаар нөхөхөөр хуулийн заалт байгаа. Тиймээс Засгийн газрын бондоор нөхнө гэж заасан учраас үүн дээр УИХ шийдвэр гарах ёстой. Нэгэнт хуультай учраас Монголбанк хуулийн дагуу ажиллах ёстой. УИХ -аас шийдвэр гарах юм бол 8 хувиас 6 хувь руу шилжүүлэх хүүний зөрүү 450-500 тэрбумын төгрөгний зардал гарах тооцоог хийсэн.