Ерөнхийлөгч ангийн найздаа хариуцлага тооцох уу?

Цэргийн албанд татагдаад сар ч болоогүй 21хэн настай залуу амь насаа алдсан харамсалтай явдал хоёр өдрийн өмнө боллоо. Унтаад өглөө нь сэрээгүй гэх асуудлыг холбогдох байгууллагууд шалгаж, шүүх шинжилгээний дүгнэлт 14 хоногийн дараа гарах талаар ЦЕГ-аас мэдээлсэн юм. Гэтэл салбарын сайд нь шүүх шинжилгээний дүгнэлт гараагүй байхад “Цэрэг гадны нөлөөгүй нас барсан, цэргийн албанд ямар нэг төрлийн дэглэлт гэх зүйл байхгүй” гэлээ.  Гадны нөлөөтэй, нөлөөгүй эсэхийг холбогдох байгууллага нь тогтоогоогүй байхад Батлан хамгаалахын сайд Г.Сайханбаяр ийнхүү мэдээлэл хийж, үүний араас зарим хэвлэлүүд хүүг хатгаа туссаны улмаас нас барсан гэж бичиж байгаа нь сайд хариуцлагаас зугтаах уу гэж хардахад хүргэж байна.

Нөгөө талаас хэрвээ хүү үнэхээр хатгаа туссаны улмаас нас барсан бол эмч нар яагаад эмчлээгүй вэ? Г.Сайханбаяр сайд цэргийн төв эмнэлгийн эмч нарыг Архангай аймагт 3 сар ажиллуулсан гэдэг. Цэргийн эмч нар хөдөө орон нутагт яагаад ажиллав? Зарим эх сурвалжийн мэдээлснээр Батлан хамгаалахын сайд Г.Сайханбаяр Архангай  аймагт нэр дэвших гэж буй гэх. Тэгвэл цэргийн эмч нарыг Архангайд дайчилж орон нутгийн иргэдийг эмчлэх болсон нь тойргийн усалгаа болж таарна. Цэргүүд өвдөж байхад салбарын сайд нь эмч нараа тойргийн усалгаанд дайчилдаг байж болохгүй байлтай. Тэгвэл ийм асуудал үүсгэсэн ангийн найздаа Ерөнхийлөгч У.Хүрэлсүх хариуцлага тооцох уу? Батлан хамгаалахын сайд Г.Сайханбаяр, Монгол Улсын Ерөнхийлөгч У.Хүрэлсүх нар Цэргийн нэгдсэн дээд сургуулийн нэг ангийн найзууд юм.