Д.Ганбаатар: Амьдрах сайхан, ихэр хөвгүүд минь миний “хөл” болдог

Баянхошууны мухар гудамжны жижигхэн байшинд тэдний гэр бүл бужигнан амьдарна. Гэрт нь ормогц “цай уу” гэсээр инээж угтана. “ Эхнэр гэрээсээ оператор хийдэг болохоор чимээ гаргаж болохгүй гээд аяархан шивнэж ярингаа цай аягална. Түүнийг Ганбаатар гэдэг. 2008 онд харамсалтай шалтгаанаар тэргэнцэр дээр сууж эхэлсэн. Түүний эхнэр ч бас тэргэнцэртэй. Тэднийх долоон настай ихэр хөвгүүд, нэг охинтой.

Д.Ганбаатар хувьд УUb Cab-ийн такси үйлчилгээнд ажилладаг. Харин эхнэр нь гэрээсээ утасны оператороор ажилладаг. Ихэр хөвгүүд болох Магнай, Баяраа хоёр бол тэдний “хөл”. Аав нь ажилдаа явахаар гэрээсээ гармагц тэргэнцэртэй нь түрсээр машин руу аваачина. Аавыгаа машинд нь суулгангуутаа тэргэнцэрийг нь багажинд нь ачиж өгөөд “аав аа болчихлоо” гэж мэдээ дамжуулна. “Ах нь архи ууж, мөрийтэй тоглодог байсан, гэхдээ ихэр хөвгүүдээ төрөхөд л энэ бүхнээсээ татгалзахаар шийдсэн”. Таксинд яваад 10 жил болж байна. Хүн ямар ч байлаа гэсэн амьдрах сайхан, амьдралд олон л өнгө туулж явна хэмээн ярина. 

Тэдний гэр бүл өөрсдийн гэсэн хашаа байшинтай болох том зорилготой. Сарын 500 мянган төгрөгөөр жижиг байшин түрээсэлж, гэртээ дулаахан уур амьсгалтай амьдарна. 16 хүүхэдтэй айлын 15 дахь хүү, эрх танхи өсөж, аавынхаа малчин удмыг залгуулахаар сургуулиа орхисон байна. Гэтэл 2006 онд мориноос унаснаар түүний амьдралд эргэлт хийжээ.