Т.Хулан: Алдаа гаргасан ч ард минь өмөлзөж, хайрлах хүнтэй байх хичнээн сайхан гээч, эмээ минь намайг их л хайраар өсгөсөн

"Та завтай юу" нэвтрүүлэгт Монгол Улсын Соёлын тэргүүний ажилтан, УДЭТ-ын Жүжигчин Т.Хуланг урьж оролцууллаа. МҮОНТ-ийн "Сарны нулимс" цуврал киногоор үзэгчдэд хамгийн их танигдаж байлаа хэмээн хуучилна. 

"Буурай эмээ минь тэнгэрт дэвшихэд надад маш хүнд байсан. Одоо ч ярихаар уйлаад байдаг юм. Эмээ минь хоёр жилийн өмнө өөд болсон. Алдсан ч ард минь нэг хүн зогсоод өмөөрч, өмөлзөхөд хичнээн сайхан байдаг гээч. Миний буурай эмээ намайг яг л ингэж дэмжиж, хайрладаг байлаа. Хүмүүс ер нь бие биеэ сайхан үгээр хэлж, бие биеэ чин сэтгэлээсээ хайрлахаа больчихсон юм шиг ээ. Би өвөө, эмээгийн хүүхэд. Жүжигчнээр ажиллаж эхлээд цалингаа авангуутаа л өвөө, эмээдээ заавал нэг зүйл авч өгдөг. Цалин буугаад өвөө, эмээ дээрээ очихоороо “хувиа аваарай” гээд л тоглодог байлаа. Эмээ маань бурхан болсноос хойш эмээгийн хувь ээж рүү маань шилжсэн. Ер нь л дэргэдэх хүмүүстээ нэмэртэй, хайрыг мэдрүүлдэг хүн байх гэж хичээдэг. Манай гэр бүл хүүхдүүдийнхээ хүмүүжилд би маш их анхаардаг. Гэхдээ бид хүүхдээ зөв хүмүүжүүллээ гэхэд бусад аав, ээж нар маань ч гэсэн хүүхдээ зөв хүмүүжүүлэхгүй бол хүүхдүүдээс буруу зүйл сурах гээд хэцүү байдаг”.

Нэвтрүүлгийг үзэх: