ХӨГЖЛИЙН БАНК: Ё.Баатарбилэг, Г.Байгалмаа нараас бусад нь сугарч үлдэв

Хөгжлийн банкны гэх хэрэгт яллагдагчаар татагдсан хүмүүсээс 9 хүн нь улс төрийн хамааралтай байна. Тэдний хоёрыг нь л гэм буруутайд тооцсон юм. Тодруулбал, УИХ-ын гишүүн Ё.Баатарбилэг, Барилга, хот байгуулалтын дэд сайд асан Г.Байгалмаа нарыг гэм буруутай гэж шүүхээс үзлээ. Харин УИХ-ын гишүүн Н.Алтанхуяг, Г.Амартүвшин, Х.Ганхуяг, Эдийн засгийн хөгжлийн сайд асан Н.Батбаяр, АН-ын дэд дарга асан Ч.Отгочулуу, ХҮН намын дарга асан Б.Найдалаа, Ж.Батзандангийн ах буюу Зам, тээврийн хөгжлийн дэд сайд асан Ж.Бат-Эрдэнэ нарыг гэм буруугүйд тооцсон юм.

Г.Байгалмаа
Барилга, хот байгуулалтын дэд сайд асан Г.Байгалмаа нь экс ерөнхийлөгч Х.Баттулгын үед Ерөнхийлөгчийн тамгын газрын даргаар ажиллаж байсан бөгөөд түүнийг хуурамч баримт бүрдүүлсэн, мөнгө угаасан хэрэгт буруутгасан юм. Тодруулбал, Ерөнхийлөгч асан Х.Баттулгын гарын үсгийг дуурайлган үйлдэж, хуурамч баримт бүрдүүлсэн, гэмт хэргийг улмаас олж авсан мөнгө гэдгийг мэдсээр байж зарцуулсан буюу мөнгө угаасан хэрэгт буруутгасан юм.
Ё.Баатарбилэг
УИХ-ын гишүүн Ё.Баатарбилэгийг “улс төрд нөлөө бүхий этгээд үндэслэлгүй хөрөнгөжих, улс төрд нөлөө бүхий этгээд хахууль авах”, гэмт хэрэгт тус тус холбогдуулан шалгасан юм. “НВЦ” компанийн ерөнхий захирал Ц.Баатарбилэг өөрийн компанид давуу байдал бий болгох зорилгоор өөрийн найз, УИХ-ын гишүүн Ё.Баатарбилэгт 100мянган ам.долларын хахуулийг хуулийн этгээдийн нэрийн өмнөөс өгсөнд буруутай гэж үзсэн юм. Зээлийг гэмт хэргийн эх үүсвэр гэдгийг мэдсээр байж эдийн засгийн эргэлтэд оруулсан. Зээлийг зориулалт бусаар зарцуулж мөнгө угаасан гэм буруутай гэж үзсэн юм.