Өрхийн орлого нэмэгдүүлэх боломжийг тодорхойлох нь цөлжилттэй тэмцэх төслийн гол ЗОРИЛГО гэж үү

Бид өмнө нь манай улсын хэмжээнд сүүлийн жилүүдэд хэрэгжсэн цөлжилттэй тэмцэх төслүүдийн тухай мэдээлсэн билээ. Байгаль орчин, аялал жуулчлалын яамны албан ёсны хуудаснаас харахад нийт 12 төсөл хөтөлбөр улсын хэмжээнд хэрэгжсэн аж.

Тэгвэл эдгээр төслийн үр дүнгийн тайлан анхаарал татаж байгаа юм. 

№1. Дараах төсөл хэрэгжиж дууссан. Герман улсаас 3.5 сая дойч маркийн санхүүжүүлэлт олгосон байна. Гэтэл төслийн үр дүн нь "Засаг захиргаа иргэдийн хамтын ажиллагаа, итгэлцлэлийг сайжруулж бэхжүүлсэн. Бэлчээрийн ашиглалтыг сайжруулах арга замыг тодорхойлсон. Өрхийн орлогын эх үүсвэрийг нэмэгдүүлэх боломжуудыг тодорхойлсон" гэжээ. 

№2. Дараах "Цөлжилттэй тэмцэх" төсөл 22 мянган ам долларын НҮБ-ын санхүүжилттэй байна. Гэтэл төслийн үр дүн нь 5 худаг гаргасан, 4 удаагийн уулзалт зохион байгуулсан, зурвас байгуулсан гэжээ.

Хамгийн сүүлийн мэдээллээр буюу 2020 оны байдлаар Монгол орны цөлжилтийн үнэлгээгээр нийт нутаг дэвсгэрийн 76.9% буюу 120.3 сая га талбай доройтсон. Үүнээс нэн хүчтэй 4.7%, хүчтэй 18.6%-ийг эзлэх ба засаг захиргааны нэгжийн хувьд Дорноговь, Дундговь, Өмнөговь, Говь-сүмбэр, Говь-Алтай, Баянхонгор, Өвөрхангай, Төв аймгийн нийт газар нутгийн 50-70% цөлжилт, газрын доройтолд өртсөн байна.  Гэтэл хэрэгжиж дууссан төслийн үр дүнг дээрх жишээнээс харж болно.

Засаг захиргаа иргэдийн итгэлцэл, өрхийн орлогын эх үүсвэр нэмэгдүүлэх боломжийг тодорхойлох нь цөлжилттэй тэмцэх төслийн гол зорилго мөн үү. НҮБ-ын санхүүжилт 22 мянган ам доллараар 5 худаг гаргаад л болоо гэж үү.