Хүчиндэх гэмт хэрэг үйлдээд зугтсан этгээдийг Турк улсаас баривчилжээ

Хүчиндэх гэмт хэрэг үйлдсэн иргэн "Б" гэгчид холбогдуулан 2019 оны тавдугаар сарын 16-нд Эрүүгийн хуулийн 12.1 дүгээр зүйлээр эрүүгийн хэрэг үүсгэж, яллагдагчаар татан мөрдөн шалгах ажиллагаа явуулсан байна. 

Уг хэргийг тус оны зургаадугаар сарын 16-нд шүүхэд шилжүүлэх саналтай Хөвсгөл аймгийн Прокурорын газарт шилжүүлсэн бөгөөд яллагдагч "Б" гэгчид хувийн баталгаа гаргах таслан сэргийлэх арга хэмжээ авчээ. 

Тэрбээр 2021 оны зургаадугаар 21-нд Сэлэнгэ аймгийн Алтанбулаг авто замын боомтоор ОХУ руу оргож, улмаар БНТУ-ын Истанбул хот руу явсан болох нь тогтоогджээ.

Түүнийг Засгийн газрын "5ш" ажиллагааны хүрээнд БНТУ-ын Истанбул хотод Гадаадын иргэдийн асуудал хариуцсан албаар дамжуулан баривчлуулж, энэ оны тавдугаар сарын 19-ний өдөр Монгол Улсад ирүүлсэн. 

Гэмт этгээдийг тавдугаар сарын 20-нд Хөвсгөл аймгийн Мөрөн суманд хуяглан хүргэж, Хөвсгөл аймаг дахь ШШГГ-т цагдан хорьж, мөрдөн шалгаж байгааг ЦЕГ-ын Хэвлэл мэдээллийн төвөөс мэдээлэв.