Хөгжлийн банкны зээлийн эргэн төлөлт 1.3 их наяд төгрөгт хүрчээ

Хөгжлийн банк 1.3 их наяд төгрөгийн эргэн төлөлт төвлөрүүллээ

Хөгжлийн банк 2022.01.20- 2023.05.15-ны өдрийг хүртэлх хугацаанд нийт 1,313.0 тэрбум төгрөгийн зээл барагдууллаа. Үүнээс 957.0 тэрбум төгрөгийг бэлэн мөнгөөр, 175.4 тэрбум төгрөг өмчлөх бусад үл хөдлөх хөрөнгөөр, 180.5 тэрбум төгрөгийг үнэт цаасаар төвлөрүүллээ. Хөгжлийн банк нь 2023 оны 05 дугаар сарын 15-ны өдрийн байдлаар 47 зээлдэгчийн 2.5 их наяд төгрөгтэй тэнцэх хэмжээний багцын үлдэгдэлтэй байна.

Эрүүгийн журмаар 42 компанийг АТГ-т шалгаж байна

Хөгжлийн банкнаас 2022 онд Эрүүгийн журмаар 42 компанийг шалгуулахаар АТГ-т гомдол гаргасан бөгөөд хэрэг мөрдөн шалгах ажиллагаа үргэлжилж байна. Хэргүүдийг багцлан эхний 20 зээлийн хувийн хэрэгт холбогдох мөрдөн шалгах ажиллагаа дуусаж, уг багцалсан 20 хэргийг прокурорт шилжүүлсэн.

Иргэний журмаар 620.9 тэрбум төгрөгийн зээлийн өр төлбөрийг шүүхээр эцэслэн шийдвэрлээд байна

Иргэний журмаар чанаргүй зээлийн өр төлбөрийг төлүүлэхээр хуулийн байгууллагаар 2018-2022 оны хооронд 38 зээлдэгчийн 1.6 их наяд төгрөгийн нэхэмжлэл гаргаж шүүхэд хүргүүлсэн. Үүнээс 22 зээлийн 620.9 тэрбум төгрөгийн зээлийн өр төлбөрийг шүүхээр эцэслэн шийдвэрлүүллээ.

Тодруулбал, “Мондулаан трейд” ХХК – 19.3 тэрбум төгрөг, “Шанх майнинг” ХХК – 7.6 тэрбум төгрөг, “Петролиум продакшн” ХХК – 12.3 тэрбум төгрөг, “Бэрэн групп” ХХК, Барилга – 43.9 тэрбум төгрөг, “Монгема” ХХК – 13.9 тэрбум төгрөг, “НВЦ” ХХК – 74.9 тэрбум төгрөг, нийт 6 зээлийн 171.9 тэрбум төгрөгийн зээлийг хялбаршуулсан журмаар шийдвэрлүүлээд байна.

Хөгжлийн банкнаас 21 төсөлд олгосон зээл бүрэн төлөгдөж хаагдсан

Зээлийн эргэн төлөлтийн бэлэн мөнгө, үнэт цаас, өмчлөх бусад үл хөдлөх хөрөнгөөр гэсэн 3 төрлөөр төлүүлж байна. Өнөөдрийн байдлаар нийт 21 төсөлд олгосон зээл хаагдсанаас 16 зээл нь бэлнээр буюу 501.6 тэрбум төгрөгөөр, 4 зээл нь өмчлөх бусад үл хөдлөх хөрөнгө, нэг зээл үнэт цаасаар төлөгдсөн.