Чойжин ламын сүм музей: Музейн хоёр га газраа Монголчууд бид эгүүлэн авч чадлаа

Олон нийтийн сүлжээнд өнөөдөр Чойжин ламын сүм музейн хашаан дахь зүлгийг устгаж шинэ барилга барих гэж байгаа талаар мэдээлэл гарсан юм.

Чойжин ламын сүм музейн захирал Д.Отгонсүрэн:

-Энэ сүмд анх шашин номын үйл ажиллагаа явуулж байсан түүхтэй. Хэлмэгдүүлэлтийн хүнд он жилүүдэд Маршал Х.Чойбалсан, Ерөнхий сайд асан А.Амар нарын шийдвэрээр 1938 онд сүмийн үйл ажиллагааг зогсоож, үзэсгэлэн судалгааны зориулалтаар сүм музей болгож авч үлдсэн байдаг. Монголын хосгүй нандин 6000 гаруй үзмэрүүд хадгалаастай. Тэр дундаа Өндөр гэгээн Занабазарын мутрын болоод сургууль хийцийн бүтээлүүдийг хадгалдаг музей гэдгээрээ онцлог. Түүхэн дурсгалт зургаан сүмтэй. Мөн хүндэтгэлийн хаалга, янпай хаалга зэрэг түүхэн дурсгалт цогцолборын дээжүүдтэй. Энэ сүмийг дөрвөн жилийн турш Омбо тэргүүтэй урлаачид ур ухаанаа шингээн барьсан байдаг.

Энэ музейн Соёлын яамны харьяа төрийн үйлчилгээний, төсвийн байгууллага. Нөгөө талаасаа энэ сүм байгуулагдаад өдгөө 115, музей болоод 85 жил болж буй.

Өмнө нь бид ажилчдаа шалгаруулж ажилд авдаг байсан, гэтэл одоо 580 мянган төгрөгийн цалинтай музейд ажиллах хүн олдохгүй болсон. Манай ажилчид -40 хэмийн хүйтэнд 115 жилийн түүхтэй музей дотроо эсгий гуталтайгаа ажилладаг, бөөр, давсаг, гуурсан хоолойн өвчтэй болсон. Бид 2 га газраа авах гэж тэмцэж ирчихээд юу гэж музейгээ нураах билээ, сан хөмрөгийн байгууламж өөр газар баригдана.