Монгол бичгийн 17 дугаар улсын олимпиад Хэнтий аймагт зохион байгуулагдлаа

Монгол бичгийн 17 дугаар улсын олимпиад Хэнтий аймгийн Чингис хотноо зохион байгуулагдлаа. Тус олимпиадыг Хэрлэн лаборатори нэгдүгээр сургуулийн 100 жилийн ойн хүрээнд нэрэмжит болгон зохион байгуулж байгаагаараа онцлог юм. Аймаг, дүүргийн монгол бичгийн олимпиадад шалгарсан 23 багш, 20 сурагч өрсөлдөж сурагчдын төрөлд тэргүүн байранд Хөвсгөл аймгийн Дэлгэрмөрөн Цогцолбор сургуулийн сурагч Б.Энхжин, багш нарын төрөлд Сүхбаатар аймгийн Баруун-Урт сумын 4 дүгээр сургуулийн багш Д.Пүрэвдорж тэргүүн байр эзэлжээ.

Нээлтийн арга хэмжээ энэ сарын 6-нд болсон бөгөөд тус аймгийн Засаг дарга Ц.Чогсомжав, Хэлний бодлогын үндэсний зөвлөлийн гишүүн, Шинжлэх ухааны доктор, профессор Ардын багш Ц.Өнөрбаян, “Ертөнц” төвийн тэргүүн, МУБИС-ийн Монгол судлалын сургуулийн багш, доктор, профессор Ү.Ариунболд, БШУГ-ын дарга С.Мөнхцэцэг, АЗДТГ-ын НБХ-ын дарга Д.Өнөрцэцэг тэргүүтэй удирдлага мэргэжилтэн, багш, сурагчид оролцсон. Олимпиадыг нээж аймгийн Засаг дарга Ц.Чогсомжав, Лаборатори нэгдүгээр сургуулийн захирал Г.Өнөртуяа нар үг хэлсэн юм.