МАН: Бизнес эрхлэгчдэд үзүүлдэг дарамт, шахалтыг таслан зогсоох чиглэлийг Засгийн газарт хүргүүллээ

Өнөөдөр /2023-04-03/ Улсын Их Хурал дахь Монгол Ардын Намын бүлгийн ээлжит хурал хуралдаж, хоёр асуудал хэлэлцэн шийдвэрлэв.

1. Бүлгийн дэд дарга сонгох тухай хэлэлцэж шийдвэрлэлээ. монгол Ардын Намын бүлэг гурван дэд даргатай байх дүрэмтэй. Энэ хүрээнд Э.Бат-Амгалан гишүүнийг дэд даргаар сонголоо.
2. Засгийн газраас 2023, 2024 оныг Аялал жуулчлалыг дэмжих жил болгон зарласан. Аялал жуулчлалын тухай хуулийн төслийг Засгийн газраас өргөн барьж, хуулийн төсөл хэлэлцүүлгийн шатанд явж байна. Энэ хүрээнд Х.Ганхуяг гишүүнээр ахлуулсан ажлын хэсэг ажиллаж байна. Тус ажлын хэсэг тодорхой саналуудыг боловсруулж, Бүлгийн хуралдаанд танилцуулж, хэлэлцсэн юм.

Хэлэлцэх асуудалд ороогүй боловч бүлгийн гишүүдийн зүгээс санал гаргасан. Сүүлийн үед бусдын бизнесийг дарамтлах, үл хөдлөх хөрөнгөд халдах явдал газар авлаа. Тиймээс энэ асуудалд шүүмжлэлтэй хандсан. Бизнес эрхлэгчдийг дарамталж, үл хөдлөх хөрөнгөнд нь халдаж байгаа халдлагуудыг таслан зогсоох арга хэмжээг яаралтай авч, эргэн тайлагнах чиглэлийг Засгийн газарт өглөө.