МҮЭХ: Монгол орон даяар хөдөлмөрийн мөлжлөгийн хар сүүдэр нөмөрлөө

МҮЭ-ийн холбооноос цалин хөлс, хөдөлмөрийн маргаан, ажил хаялт зарласан нөхцөл байдал болон нийгмийн даатгалын багц хууль, ХАБ, эрүүл ахуйн сарын аян, цаг үеийн асуудлаар мэдээлэл хийлээ.

 Монголын үйлдвэрчний эвлэлийн холбооны ерөнхийлөгч С.Эрдэнэбат "Баян хоосны ялгамж маш их гарч байна. Хулгай хийсэн хүмүүс нь баяжаад, ажил хийж амьдралаа залгуулж буй хүмүүс өрнөөс өрний хооронд амьдарч байна. Монгол Улсын бүх иргэд авсан цалингаараа сайхан амьдарч чадахгүй байна. Иймд Хөдөлмөрийн хөлсний доод хэмжээг 880 мянган төгрөг болгох хэрэгтэй. Одоо байгаа 550 мянган төгрөгөөр нэг хүнийг тэжээх, наад захын хэрэгцээг нь хангах ч боломжгүй. 

Мөн Үндэсний статистикийн хорооноос тогтмол дундаж цалингийн үзүүлэлтийг гаргадаг. Ингэхдээ дундаж цалин нэг сая таван зуун мянга гэж зарлаж байна. Ажил хийж хөдөлмөрлөж байгаа иргэд тийм цалин авахгүй байна. Иймд тус статистикийн хороо Хөдөлмөр нийгмийн түншлэлийн үндэсний хороонд асуудлаа тавьж бодитоо тоонуудаа гаргадаг байх хэрэгтэй.

Түүнчлэн саяхан төрийн албан хаагчдын цалинг нэмсэн. Нэмэхдээ төрийн албан хаагчдын цалингийн шинэчлэл, цалин хөлсний нэмэгдүүлэх асуудлыг Хөдөлмөр нийгмийн түншлэлийн үндэсний хороонд эцэслэн зөвшилцөхгүйгээр тогтоосон байна. Ингэсний улмаас дарга нарын цалинг илүү өндөр нэмсэн. Тухайлбал, дарга нарын цалинг 50-60 хувиар нэмсэн бол ажилчдын цалинг ердөө 8 хувиар нэмсэн байна. Хөдөлмөрийн ялгавралан гадуурхах үзлийг төр гаргаж болохгүй. 

Мөн Боловсролын сангийн зээлтэй холбоотой асуудал сүүлийн хэдэн өдөр эрчимтэй үргэлжилж байна. Нийт боловсролын сангаас зээл авсан хүмүүсийн 70-аад хувь нь дарга нарын хүүхдүүд эсвэл төлбөрийн чадамжтай айлын хүүхдүүд суралцсан байна. Иймд Боловсролын сангийн зээлтэй холбоотой асуудлыг шийдвэрлэх тусгай баг гаргах хэрэгтэй. Эл асуудлаар ойрын хугацаанд нээлттэй сонсгол зохион байгуулж, мэдээллийг ил тод болго" гэв.