“Галдан бошигт хаан” сэдэвт шуудангийн маркийн анхны өдрийн нээлтийн арга хэмжээ өнөөдөр /2022.02.22/ Ховд аймагт зохион байгуулагдлаа.

Тус арга хэмжээнд УИХ-ын гишүүн Ш. Адьшаа, аймгийн Засаг даргын орлогч Т.Дэлгэрсайхан, ИТХ-ын нарийн бичгийн дарга Б.Сандагсүрэн, “Монгол шуудан” ХК-ийн гүйцэтгэх захирал Б.Анхбаатар, болон түүх судлаачид, иргэдийн төлөөлөл оролцлоо.

Энэ үеэр аймгийн ИТХ-ын нарийн бичгийн дарга Б.Сандагсүрэн, “Монгол шуудан” ХК-ийн гүйцэтгэх захирал Б.Анхбаатар нар “Галдан бошигт хаан” сэдэвт шуудангийн маркийн анхны өдрийн дугтуйнд гарын үсэг зурж, тамгалсан нь ёслолын нэг чухал хэсэг байлаа.
“Галдан Бошигт хаан” сэдэвт шуудангийн марк нь Монгол улсын Шуудангийн үйлчилгээнд шинээр орж буй 1097 дахь сэдэвт марк юм. Энэхүү марканд Галданбошигт хаан, Анухатан, харлаг сүлд барьсан Данжила жанжин нар их цэргээ манлайлж яваа байдалтай, Цамбагарав хайрхан, цагаан шонхор шувуу, хааны хүрээ, бошигтын бух зэрэг дүрсийг багтаан “Сэтгэлдээ багтааж чадвал их, бага үгүй” гэсэн үгийг тод бичгээр дүрслэн бүтээжээ.
Маркийг 20000 ширхгээр хэвлэсэн бол зураачаар Г.Баттөр, дизайнераар Ж.Ганхуяг ажиллажээ.