Ж.Ганбаатар: Биржээр нүүрс арилжаалах шийдвэрээсээ буцахгүй, худалдан авагч талд “Дасан зохицоорой” гэж хэлсэн

Засгийн газрын 2022 оны арванхоёрдугаар сарын 14-ний өдрийн 466 дугаар тогтоолоор "Экспортод гаргах нүүрсний нээлттэй цахим арилжааны журам"-ыг батлан хэрэгжүүлж буй. 

Журмын хүрээнд Монголын Хөрөнгийн биржээр дамжуулан энэ оны нэгдүгээр сарын 12-ны өдрөөс нийт таван удаагийн худалдаанаар “Эрдэнэс Тавантолгой” ХК болон “Энержи ресурс” ХХК-ийн 210 мянган тонн нүүрс худалдаалжээ.

Биржээр нүүрс арилжаалж эхэлсэнтэй холбоотойгоор зарим асуудлын хүрээнд УУХҮ-ийн сайд Ж.Ганбаатараас тодрууллаа.

Тэрбээр "Уурхайн ам нөхцлөөр 60-70 ам.доллараар зардаг байсан нүүрсээ бид 120 ам.доллараар зарж байгаа. Мэдээж 60, 70 ам.доллараар авч байсан хүмүүсийн хувьд шууд 178 ам.доллараар зарласнаар нүүрсний арилжаанд болгоомжтой оролцож байгаа нь үнэн. Хууль нь албан ёсоор долдугаар сарын 1-нээс хэрэгжиж эхлэх хүртэл зөвхөн туршилтын журмаар биржийг ажиллуулж байгаа. 

Ингэснээр  Монгол Улсын баялаг, ард түмний баялаг ширээн доогуур наймаалцдаг байсан асуудал зогссон гэсэн үг. Худалдан авагчдын зүгээс дургүйцэж байгаа нь үнэн. Бид  биржээр тогтсон үнээр нүүрсийг гэрээлэх ёстой. Хэрвээ урт хугацааны гэрээ хийх гэж байгаа бол зөвхөн биржээс л авах ёстой. Хуучин  байгуулсан  гэрээнүүдэд бол  бид  зарим талд нь хүндэлтгэлтэй хандаж байгаа. Уурхайнуудын талаас өөрсдөө шийдвэрлэх асуудал. 60-70 ам.доллараар хийгдсэн  байгаа нүүрсний үнийг өсгөх ёстой. Ширээний  ард сууж байгаад аливаа асуудлыг шийддэг тэр соёл руу орох ёстой. Энэ хүрээнд манай яам болон Монгол Улсын Засгийн газар ажиллаж байна. Биржээр нүүрс арилжаалах шийдвэрээсээ буцахгүй, худалдан авагч талд “Дасан зохицоорой” гэдгийг хэлсэн" гэлээ.