ЗХУТ: Түгжрэлийг бууруулахын тулд энэ туршилтыг хийх гэж оролдсон юм, буруу юм хийсэн бол уучлаарай

Нийслэлийн авто замын түгжрэлийг бууруулахын тулд зарим уулзварыг нэг чигийн хөдөлгөөнтэй болгох туршилт хийх гэж байгаагаа өнгөрсөн долоо хоногт холбогдох албанаас зарласан. Тэгвэл Нарны гүүрний доод талын буцаж эргэх хөдөлгөөнийг нэг чигийн хөдөлгөөнтэй болгож байгаа юм. Тэгвэл үүнийг Нарны хороолол болон ойролцоох хотхоны оршин суугчид эсэргүүцэж буйгаа өнөөдөр илэрхийлэв.

Замын Хөдөлгөөний Удирдлагын Төв(ЗХУТ)-ийн Хөдөлгөөн зохицуулалт хяналтын хэлтсийн дарга Н.Намуу "Алтай хотхоны оршин суугчид хүүхдээ хүргэж өгөхийн тулд өглөө, оройн ачааллын үеэр буцаж эргэдэг. Буцаж эргэх үйлдэл нь бусад хөдөлгөөнийг огтлолцуулж, аюулгүй байдал хангахгүйгээс шалтгаалж маш их эрсдэл үүсээд байна. Иймд Алтай хотхонд шинээр замын тэмдэг тэмдэглэгээний ажлууд хийгдэж байгаа. Алтай хотхоны оршин суугчид хүүхдээ сургуульд хүргэхийн тулд уулзварын голд буцаж эргэхгүй, нийтийн эрх ашгийг хөндөхгүйгээр зарим зохицуулалтыг хийж байна.Нарны гүүрний доод талын буцаж эргэх хөдөлгөөнийг нэг чигийн хөдөлгөөнтэй болгож байгаа" гэсэн юм. 

Нарны хороолол болон ойролцоох хотхоны оршин суугчид эсэргүүцэж буйгаа өнөөдөр илэрхийлэв. Иргэдийн хэлж буйгаар уг зохицуулалтыг хэрэгжүүлбэл хүүхдүүдийн эрүүл, аюулгүй орчинд амьдрах эрх хөндөгдөж, сургууль, цэцэрлэгтээ явахад нь эрсдэл үүсэж болзошгүй хэмээн үзэж байгаагаа юм. Оршин суугчид "Иргэдийн амь нас, эрүүл мэнд, аюулгүй байдлаар туршилт хийж болохгүй", "Хүүхдийн зорчих эрх хороолол дотроо аюултай боллоо", "Машинаа бодсон бол хүнээ бас бодолцож шийдвэрээ гаргана уу", "Нэг хороолол дундуур нөгөө хорооллын иргэд дамжин өнгөрөх нь зөв шийдэл биш" гэх зэрэг бичиг барьж, эсэргүүцлээ илэрхийллээ.