Баянзүрх дүүргийн Засаг дарга Н.Баярмөнх 13,14-р хороонд ажиллалаа

Баянзүрх дүүргийн 14-р хороо нь 11300 хүн амтай. Нийт хүн амын 40 хувь нь гэр хороололд, 60 хувь нь орон сууцанд амьдарч байна. Бүтээн байгуулалтын ажлын хувьд сургууль, цэцэрлэгийн барилгын ажил энэ онд эхлэх бол хоёр байршилд автобусны буудлын тохижилтын ажил хийгдэнэ. 14 дүгээр хороонд таван компани дахин төлөвлөлтийн төслийн ажлыг хийж гүйцэтгэж байгаа юм.

Баянзүрх дүүргийн 13 дугаар хороо нь 2029 өрх, 17394 хүн амтай. 2-5 насны цэцэрлэгт хамрагдах нийт хүүхдийн тоо 1120 бол сургуулийн насны 8000 гаруй хүүхэдтэй. Боловсролын хүртээмжийг нэмэгдүүлэх үүднээс сургууль, цэцэрлэгийн удирдлага, хорооны засаг дарга дүүрэгтэй хамтран ажиллаж байна. 13 дугаар хороонд дөрвөн байршилд дахин төлөвлөлтийн ажил хийгдэж байна. Дахин төлөвлөлтийн ажил хийгдэж байгаа нь сайн ч төлөвлөлтийг зөв байгуулах, барилга бариад өнгөрөх бус сургууль, цэцэрлэг, өрхийн эрүүл мэндийн төвийн асуудлыг хамтад нь шийдэх нь чухал гэдгийг хороодын засаг дарга нар хэлж, засаг даргыг дэмжиж ажиллахыг хүслээ.

Дахин төлөвлөлттэй холбоотойгоор хэлэлцүүлэг зохион байгуулна. Энэ үеэр тулгамдаж буй асуудлыг ярилцана. Тиймээс хороодын засаг дарга нарыг хэлэлцүүлэг оролцох, дахин төлөвлөлтийн ажлыг эхлүүлэхдээ сургууль, цэцэрлэг, өрхийн эмнэлгийн барилгын ажлыг хамтад нь шийдэх саналаа гаргах хэрэгтэй гэдгийг Баянзүрх дүүргийн Засаг дарга Н.Баярмөнх онцоллоо гэж Баянзүрх дүүргээс мэдээллээ.