С.Чинзориг: Эмийн үнэ 40 хувиар нэмэгдсэн байна, эмийн сангуудад шалгалт хийж эхэлсэн

Эмийн чанар болон үнийн асуудлаар Эрүүл мэндийн сайд С.Чинзоригоос тодрууллаа.

-Эмийн чанар болон үнийн асуудал дээр хамтарсан ажлын хэсгээс шалгалт хийж байгаа гэсэн мэдээлэл байгаа. Шалгалтын нөхцөл байдлын талаар мэдээлэл өгөхгүй юу?

 -Өнөөдөр эм ханган нийлүүлэлтийн байгууллагуудын төлөөлөлтэй уулзсан. Эмийн үнэ өндөр, чанарын шаардлага хангахгүй байна гэдэг асуудал яригддаг. Энэ асуудлаар ярилцъя гэдэг байдлаар өнөөдрийн уулзалт болсон. Ирэх долоо хоногоос Засгийн газарт эм ханган нийлүүлэлтийн асуудлаа танилцуулахаар төлөвлөж байна. Шадар сайдтай хамтарсан тушаал гаргаад ШӨХТГ, Эрүүл мэндийн яам, Эмийн агентлаг хамтарсан ажлын хэсэг гарсан. Эмийн үнийн өсөлт, чанартай холбоотой асуудалд шалгалт хийх ажил энэ долоо хоногт эхэлж байгаа. Энэ шалгалтын дүн гарахаар эмийн үнийн өсөлт, чанартай холбоотой асуудал бодитой болох байх.

-Таны авсан мэдээллээр эмийн үнэ хэдэн хувь өссөн бэ, иргэдийн шүүмжлэл их байгаа шүү дээ?

-Ковидын нөхцөл байдлаас болоод зөвхөн эмийн үнэ гэлтгүй бүхий л бараа бүтээгдэхүүний үнэ өндөр өсөлттэй байна шүү дээ. Инфляцийн түвшин орчим хувьтай байж байгаад 12 болж байна. Өргөн хэрэглээний бараа бүтээгдэхүүн түүн дотроо эм тарианы үнийн өсөлт өндөр байна. Би статистикийн мэдээ авч үзсэн. Нэг жилийн дотор эм тарианы үнэ 40 хувиар өссөн гэсэн судалгаа гарсан байна лээ. 2021, 2022 онд ковидын нөхцөл байдалтай, валютын ханшийн өсөлттэй холбоотой тээврийн зардал өссөн гэхчлэн маш олон зүйл нөлөөлж байгаа байх. Цаашид эмийн үнийг буулгах ямар арга байх уу, хууль эрх зүйн орчинд өөрчлөлт оруулж шийдэх гэхчлэн олон асуудлууд байна. Эм ханган нийлүүлэлтийн байгууллагуудтай энэ асуудлаар ярилцаж байна.

-Шалгалт хэдий хэр хугацаанд үргэлжлэх вэ?

-Энэ долоо хоногоос эхэлж байгаа. Бараг сар орчим үргэлжлэх байх.