Гурван настай хүүг зодсон этгээд 100 гаруй хүнээс 1.4 тэрбум төгрөг залилж байжээ

Гурван настай хүү хойд эцэгтээ зодуулж, хүндээр бэртэж, одоо ухаангүй байгаа талаар мэдээлсэн. Тэгвэл хүүг хүчирхийлсэн гэх Э нь үл хөдлөх хөрөнгийн луйврын хэргээр өмнө нь эрэн сурвалжлагдаж байжээ.

Тодруулбал “Мөнгө зээлж, байранд суулгана. Түрээслээд өмчлөх нөхцлөөр байртай болгоно” зэргээр хуурамч гэрээ байгуулж, 100 гаруй хүнээс 1.4 тэрбум төгрөг залилжээ.

Хэргийг эргэн сануулахад Гуравдугаар сарын 6-7-нд шилжих шөнө Баянгол дүүргийн 10 дугаар хороонд гурван настай эрэгтэй Б нь бусдад зодуулж гуравдугаар сарын 8-ний 09:40 цагт ГССҮТ-д ухаангүй хүргэгдсэн.  Шалгалтын явцад Л-ийн хамтран амьдрагч Э нь 3-6 насны хүүхдүүдийг гэртээ харж үлдэхдээ гурван настай, эрэгтэй Б-г зодсон байж болзошгүй нөхцөл байдал тогтоогдсон. Л-ийн хамтран амьдрагч 34 настай, эрэгтэй Э нь эмнэлгийн байгууллагад хүргэсний дараа зугтаасан. Түүнийг цагдаагийн байгууллагаас шуурхай эрэн сурвалжилж цагдан хорьсон юм.