​ Аяа охиныг хулгайлахаар завдсан этгээд баривчлах үеээр биеэс нь их хэмжээний мөнгө олджээ

Газар хөдлөлтийн дараа нурсан барилгын нуранги дор төрж, ээж нь нас барсан ч хүй нь тасраагүй чигээрээ олдож, аврагдсан Аяа охиныг зэвсэгтэй этгээд эмнэлгээс хулгайлахаар завджээ.
Туркийн цагдаа нар эмнэлгийн тасгаас хүүхдийг хулгайлах гэж байсан хуурамч цагдааг барьж, нярайг дахин хулгайлагдахаас сэргийлэн аюулгүй газарт шилжүүлжээ. Эмнэлгийн ажилтнууд цагдаа хувцастай тэр залууг орж ирмэгц хуурамч гэдгийг нь хурдан ойлгож, нэгэн ажилтан жинхэнэ цагдаа дуудсан байна. Аяа охиныг нурангин доороос гаргаж ирснээсээ хойш Сирийн хойд хэсэгт эмнэлэгт хэвтэн эмчлүүлж байсан охиныг төрсөн цагаас нь эхлэн дэлхий нийт анхаарч, дэлхийн өнцөг булан бүрээс хүмүүс түүнд туслахаа мэдэгдээд байсан. Хатай мужийн Самандаг дүүрэгт байрлах эмнэлэг рүү нэгэн цагдаа хувцастай нэгэн эр өөрийгөө цагдаагийн дарга хэмээн танилцуулан орж ирээд охиныг хулгайлахыг завдсан тухай Анадолу агентлаг мэдээлэв. 

Эмнэлгийн ажилтнууд түүний цагдаагийн үнэмлэх хуурамч болохыг анзаарчээ. Цагдаагийнхан уг этгээдийг баривчилж, биеэс нь хуурамч цагдаа, цэргийн үнэмлэх, алт, турк лира, доллар, 6500 ам.доллартай тэнцэх евро зэрэг их хэмжээний мөнгө олжээ. Одоогоор цагдаагийн газар аюулгүй байдлын үүднээс хүүхдийн талаар мэдээлэл өгөөгүй байна. Аяаг өөрийн хүүхдийн хамт хөхүүлж, асарч буй эмч 7 хоногийн өмнө хэвлэлд ярилцлага өгөх үеэрээ Аяа өнчирсөн тул түүнийг яаран үрчлүүлэхийг хүсэхгүй байгаагаа, мөн хамаатнууд нь ирвэл хүлээлгэн өгөх хүртлээ эмнэлэгт эмчилж, асарч байх болно гэх зэргээр ярьсан билээ. Уг мэдээллийн дараа гадаадын олон орноос охиныг үрчлэн авах хэдэн мянган санал эмнэлэгт болон холбогдох албаныханд ирээд байсан. Мөн хэд хэдэн хүмүүс Аяагийн хамаатан гэж худал мэдүүлж, авахаар ирсэн тул инкубаторт байгаа охиныг орон нутгийн цагдаа нар хамгаалалтандаа аваад байна.
Сүйрэлд өртсөн бүс нутгийн эцэг эхчүүд энэхүү эмх замбараагүй байдлаас үүдэн сайн дурынхан гэх зэрэг хэн ч хамаагүй оролцож байсан аврах ажиллагааны үеэр хүүхэд хулгайлах тохиолдол гарсан байж болзошгүйд санаа зовниж эхэллээ. Амьд, эсвэл нас барсан эсэх нь тодорхойгүй, олдохгүй ор сураггүй байгаа хүүхдүүдийг хулгайлагдсан байх вий гэж эцэг эхчүүд түгшиж байна.
Туркийн Гэр бүлийн сайд Деря Яник газар хөдлөлтийн улмаас дор хаяж 1362 хүүхэд гэр бүлээсээ салсан тухай мэдэгдэв.
Эх сурвалж: Анодулу агентлаг.
Гэрэл зураг: Anodulu agency.