Анхааруулга: Голын мөсний зузаан өмнөх оноос 10-60 см нимгэн байна

Иргэдийн  санамсар болгоомжгүй үйлдлээс шалтгаалан гол мөрний мөсөн дээгүүр тээврийн хэрэгсэлтэй зорчсноос мөсөнд цөмрөх, автомашинтайгаа суух, осолдох тохиолдол гарсаар байна.

Сар шинийн өдрүүдэд хөдөө явах иргэдийн хөдөлгөөн эрс ихэсдэг. Энэ сарын 13-наас эхлэн нутгийн ихэнх хэсгээр дулаарч, хүйтний эрч суларч байгаа тул хөдөө орон нутгийг зорьж буй иргэд гол, нуурын мөсөн дээгүүр гарахгүй байхыг Онцгой байдлын ерөнхий газраас анхаарууллаа.

Төв, орон нутгийн Онцгой байдлын байгууллагын алба хаагчид он гарсаар улсын хэмжээнд гол, нуурын мөсөнд цөмөрсөн найман удаагийн дуудлагаар ажилласан. Алба хаагчид 13 иргэний аюулгүй байдлыг ханган, гурван иргэний амь насыг аварч, таван тээврийн хэрэгслийг татан гаргажээ.

Цаг уурын байгууллагаас ирүүлсэн мэдээгээр манай орны ихэнх гол мөрөн, нуурын мөсний зузаан өмнөх 10 хоногоос 5-10 см нэмэгдсэн хэдий ч  ихэнх голын мөсний зузаан өмнөх оны мөн үеийнхээс 10-60 см нимгэн байна. Нуурын толио болон голын нийт уртын дагууд мөсний зузаан харилцан адилгүй, голын зарим хэсгээр мөс нимгэрч хэврэгших үзэгдэл ажиглагдаж эхэлжээ.

Иймд сар шинийн баярын өдрүүдэд цаг хожих, зам товчлох зэргээр мөсөн дээгүүр явах болон авто тээвэр хийхгүй байж баталгаатай замаар зорчиж мөс цөмрөх аюулаас сэрэмжтэй байхыг ард иргэдэд онцгойлон анхааруулж байна.