Хөгжлийн банкны хэргийн урьдчидсан хэлэлцүүлгийг хаалттай явуулах шийдвэр гарч, сэтгүүлчдийг хөөлөө

“Хөгжлийн банкинд” холбогдох хэргийн шүүхийн урьдчилсан хэлэлцүүлэг эхлээд байсан ч шүүгдэгч нарыг өмгөөлж буй 14 өмгөөлөгч хуралдаан даргалагчаас татгалзах хүсэлт гаргаж, Шүүхийн ерөнхий зөвлөл уг асуудлыг хэлэлцсэн юм. Гэвч Шүүхийн ерөнхий зөвлөл эл асуудлыг хэлэлцээд 100 хувийн саналаар хүлээн аваагүй байна. Иймээс түр завсарлуулаад байсан "Хөгжлийн банкинд" холбогдох хэргийн урьдчилсан хэлэлцүүлгийг үргэлжлүүлж байна. Энэхүү урьдчилсан хэлэлцүүлэгт прокурор 6, яллагдагч 58, Иргэний хариуцагч 4, өмгөөлөгч 15, хохирогчийн хууль ёсны төлөөлөгч 14 нийт 98 оролцогч оролцож байна.

Дөнгөж сая Хөгжлийн банкны захирал асан Б.Батбаярын өмгөөлөгч П.Одонтунгалагийн хүсэлтээр шүүх хурал хаалттай явахаар  санал гаргажээ.

Шүүхийн ерөнхий зөвлөлөөс Хөгжлийн банкны шүүх хурлыг нээлттэй явуулах шийдвэр гаргасан. Гэвч өмгөөлөгч нар "Хувь хүний нууцад хамаарах мэдээлэл яригдах учраас шүүх хурлыг хаалттай явуулж өгнө үү" хэмээн хүсэлт гаргалаа. Шүүх хуралд оролцож буй прокурорууд ч тэдний саналыг дэмжиж байгаагаа илэрхийлсэн юм. Улмаар шүүгчид зөвлөлдөөд шүүх хурлыг хаалттай явуулах нь зүтэй гэж үзлээ. Ингэснээр шүүх хурал хаалттай үргэлжилж байна.