“Инээмтгий хүн” романыг тайзны бүтээл болгон 3-р сарын 04-нөөс эхлэн үзэгчдэд толилуулна

Pro театрын уран бүтээлчид , Францын алдарт зохиолч Виктор Хюгогийн туурвисан бүтээлүүдийн ноён оргил болох “Инээмтгий хүн” романыг тайзны бүтээл болгон туурвиж ирэх 3-р сарын 04-нөөс эхлэн үзэгчдийн хртээл болгох гэж байна.

Тэд 2014 онд ОХУ-н Санкт-Петербург хотын Театр урлагийн академийг найруулагч жүжигчин мэргэжлээр төгссөн нэг ангийн уран бүтээлч залуучууд юм.

2022 онд эх орондоо эргэн ирж Pro  театрыг байгуулан уран бүтээлээ туурвиж эхэлсэн бөгөөд өнгөрсөн 2022 оны 12 -р сард “Гайхамшигт хүүхэлдэй” шоу тоглолтыг хүүхэд багачууддаа зориулан тоглосон.

“Инээмтгий хүн”  жүжгийн тухайд: Магадгүй хамгийн эмгэнэлт зохиол бас хамгийн аугаа хайрын тухай өгүүлэх зохиол гэлтэй. Жүжгийн үйл явдал үйл явдал XVII-XVIII зууны зааг үеийн Англид өрнөнө. Энэ зохиолд Лорд Линней Кленчарлийн азгүй хайр дурлал, золгүй хувь тавиланг зүрх шимширмээр өгүүлсэн байдаг. Тэрээр юуч мэдэхгүй нялх багадаа муу хүмүүсийн гарт орж үзэшгүй муухайгаар зэрэмдэглүүлэх ба Гуинплен хэмээх нэр зүүж хэрмэл жүжигчин болдог. Гуинплений бага байхдаа олж амийг нь аварсан сохор охин Дея өсөж том болоод тэд бие биедээ хайртай болдог. Үзэшгүй муухай зэрэмдэг Гуинплен, хосгүй гоо үзэсгэлэнтэй боловч сохор бүсгүй Дея нар бие биедээ яг таарч тохирсон хос болдог. Хожим нь Гуинплен ховор аз завшаанаар өөрийн өндөр байр сууринд хүрэх боловч энэ нь түүнд сайн юм авчирдаггүй нь харамсалтай...

Тус жүжгийн ерөнхий продюсерээр СТА жүжигчин, найруулагч О.Итгэл, ерөнхий найруулагчаар Б.Даваасүрэн, Хөгжмийн зохиолчоор ОХУ-ын хөгжмийн зохиолч Дахалэ. С. Ж, Ерөнхий зураач: Б. Анхбаатар нар ажиллаж байна.

Дүрүүдэд:

Девид – З. Булган

Баркельфедро – О. Итгэл /СТА/

Анна – О. Минжинсор

Жозианна – Э. Буд-Эрдэнэ

Хомо – З. Булган

Урсус – Ц. Төмөрхуяг /МУГЖ/

Дея – Т. Энэрэл /СТА/

Гуинплен - Б. Билгүүн