Туркийн Тээврийн яам алдаагаа хурдан засав

Газар хөдлөлтийн улмаас хамгийн их сүйрэл амссан мужуудын нэг болох Туркийн Хатай нисэх онгоцны буудал дахин ажиллаж эхэлсэн тухай Туркийн Тээврийн яам Ням гарагт мэдэгдэв. “Бид Хатай нисэх онгоцны буудлын хөөрөх зурвас үүссэн эвдрэлийг маш хурдан хугацаанд зассан. Манай нисэх онгоцны буудал өнөөдрөөс эхлэн ажиллаж эхэллээ” гэж Туркийн Зам тээвэр, дэд бүтцийн яам албан ёсны твиттер хуудсандаа 7.8 баллын газар хөдлөлтийн дараа ихээхэн эвдэрсэн, албаныхан “ашиглах боломжгүй” гэж үзсэн нисэх буудлын хөөрөх зурвасын өмнөх болон дараах зургийг хуваалцжээ.

Туркийн төрийн болон олон нийтийн барилга байгууламжууд гэнэтийн осол, байгалийн гамшигт хамгийн тэсвэртэй байх ёстой атал бараг хамгийн түрүүнд эвдэрч, ашиглах боломжгүй болсноос гадны тусламжийг ч авч чадахгүйд хүрч байна хэмээн дотооддоо болон гадаадад хурцаар шүүмжлүүлээд байсан билээ. IGA Станбул нисэх онгоцны буудлын операторын мэдээлснээр засварын ажил 96 цаг үргэлжилсэн байна. 

Истанбулын нисэх онгоцны буудлын Техникийн үйлчилгээний ерөнхий менежерийн орлогч Фират Эмсен “Барилгын болон техникийн баг 4 өдрийн турш тасралтгүй ажилласан” гэж Туркийн төрийн мэдлийн Анадолу агентлагт мэдээлжээ. Уг нисэх онгоцны буудал нь газар хөдлөлтөд хүчтэй өртсөн Антакья, Искендерун хоёр хотын хооронд байрладаг, гамшгийн бүсэд ирж буй тусламжийг хурдан, үр дүнтэй хуваарилах, аливаа тусламжийг Хатай болон ойр орчмын мужуудад хүргэхэд чухал үүрэгтэйг хэвлэл мэдээллийнхэн онцолж байсан юм.

Эх сурвалж: Isil Sariyuce and Chris Liakos, CNN

Гэрэл зураг: Туркийн Хатай нисэх онгоцны буудлынэвдэрсэн хэсгүүдийг зассан байдал. Twitter.