​Алтайн махны үзэсгэлэн худалдаа Барс-2 зах дээр гарч байна

Алтайн махны үзэсгэлэн худалдаа Барс-2 зах дээр зохион байгуулагдлаа.

Уг үзэсгэлэн худалдаагаар дамжуулан Говь-Алтай аймгийн 18 сумын амт чанар сайтай махыг ченжийн гар дамжуулалгүйгээр Барс-2 худалдааны төв дээрээс авах боломжтой болж байна. Цаашид нутгийн “Шимт богц” брэндийн махаа онлайн худалдааны сайтаар захиалж, гэртээ хүргүүлэн авах боломжтой боллоо.

2020 онд Ковидын хүнд хэцүү цаг үед Говь-Алтай аймгаас зохион байгуулагдаж байсан “Хүргэлт” арга хэмжээ гурав жилдээ болж байгаа нь энэ юм.

Ингэснээр малчид махаа ченжээр дамжуулалгүй Улаанбаатарын хэрэглэгчдэд хүргэж байна. Тус аймгийнхан Барс-2 худалдааны төвд малын мах борлуулах лангууг сум тус бүрээр түрээслэжээ. 

Идэш бэлтгэх үеэр буюу өнөөдрөөс /2022-12-01/ -ээс тус худалдааны төвд Алтай нутгийн махны амталгаат худалдааг зохион байгуулах юм.

Түүнчлэн малчдын хоршоо, үйлдвэрүүд Хөдөө аж ахуйн биржээр дамжуулан амьд малыг дуудлага худалдаанд оролцож худалдах, худалдан авах боломж бүрдлээ.