Б.Ууганбаяр: Бидний мэргэжлийн стандарт нэг учраас аврах ажиллагаанд хүндрэл гарахгүй

Манай улсаас 35 хүний бүрэлдэхүүнтэй багаа, Бүгд Найрамдах Турк Улсын эрэн хайх, аврах ажиллагаанд оролцуулахаар илгээгээд байгаа. Тус бүрэлдэхүүнийг ОБЕГ-ын дэд дарга, бригадын генерал Б.Ууганбаяр ахлан ажиллах юм. Түүнийг явахаас өмнө авсан тодруулга яриаг хүргэж байна.

-Таниар ахлуулсан манай улсын баг хэрхэн ажиллах вэ?

-Бид бусад улсын эрэн хайх ажиллагааг зохион байгуулах багуудтай харилцан хамтран ажиллана. Нэг газрыг эрэн хайх ажиллагаа хийгээд дууссан гээд тэмдэглэгээ хийсэн байхад тэр газрыг бид очоод дахин үзээд байх шаардлага байхгүй. Орон нутгийн онцгой байдлын газартай уялдаж ажилладаг. Газар хөдлөлтийн голомтын ойролцоо бид байршина. Бид өөрсдийн платка аваад явж байгаа. Тэндээ байрлаад аврах үйл ажиллагаа зохион байгуулна. Орон нутгийн онцгой байдлын байгууллагад бид хүндрэл учруулах ёсгүй байдаг.

Бидний эрэн хайр ажиллагааны тэмдэглэгээ хүртэл нэг байх ёстой, Орос, Япон, Монгол гэсэн ялгаа байхгүй нэг стандарттай бүгд адил түвшний багууд ажиллаж байгаа. Энэ хэрээгээрээ тэмдэглэгээгээ хийгээд, илтгэлээ өгөөд, оройны уулзалтаа хийгээд, маргааш нь ямар ажлууд хийх, ямар блокт очих гэхчлэн ажилладаг. Тэр орон нутагтай холбож өгөх харилцан ажиллагаа уялдуулан зохицуулсан стандарт, дүрэм журмын хүрээнд ажиллана.